Халилзод мехоҳад Кобулу Толибонро ба гуфтушунид водор кунад
Намояндаи махсуси ИМА дар умури Афғонистон Залмай Халилзод ба хотири хотима додан ба ҷанги 17-сола бо Толибон мулоқотҳоеро бо мақомоти Кобул анҷом дод.
Халилзоди афғонтабор, собиқ сафири Амрико дар Кобул ва Ироқ, моҳи сентябри соли ҷорӣ роҳбари тими махсуси Департаменти давлатии ИМА дар умур гуфтушуниди сулҳу оштӣ бо Толибон таъин гардид.
Сухангӯи Ашраф Ғанӣ, раисиҷумҳури Афғонистон гуфт, ки Халилзод баробари расидан ба Кобул, рӯзи 8 октябр бо вазирон ва дипломатҳо мулоқот кард.
Қабл аз ин, Департаменти давлатии ИМА гуфт, ки Халилзод талошҳои таҳти назари Амрикоро барои ба мизи музокирот овардани Толибон ҳамоҳанг мекунад. Халилзод аз 4 то 14 октябри соли ҷорӣ роҳбарии ҳайъатҳои байнихадамотиро ба Афғонистон, Покистон, Иёлоти Муттаҳидаи Араб, Қатар ва Арабистони Саъудӣ ба зиммаи худ хоҳад гирифт.
Сафари Халилзод ба он замоне рост меояд, ки гурӯҳи Толибон ва гурӯҳи террористии “Давлати Исломӣ” дар пешорӯи интихоботи зудраси порлумонӣ хуҷуми худро дар саросари ин кишвар дучанд кардаанд.
“Сулҳ ин раванди мукаддас аст ва миллату ҳукумати Амрико бо миллату ҳукумати Афғонистон дар ин раванд ҳамдиланд” – гуфт дафтари Ашраф Ғанӣ аз қавли залмай Халилзод.
Аз соли 2001, аз замоне, ки эътилофи таҳти назари ИМА Толибонро аз қудрат дур кард, ҳукумати Афғонистон бо ҷангиёни Толибон, Ал-Қоида ва солҳои ахир бо "Давлати Исломӣ" мубориза мебарад.
Толибон пешниҳоди ҳукумати Афғонистонро барои гуфтушуниди сулҳ ва ё кӯмак дар интихоботи 20 октябрро рад кардаанд.
“Давлати Исломӣ” ва Ал- Қоида дар оташбасҳоии қаблӣ ҳамроҳ набуданд ва интизор намеравад, ки дар баррасиҳои кунунии Толибону Кобул ҷое дошта бошанд.
Халилзод дар ҳоле мехоҳад Толибон ва ҳукумати Афғонистонро ба сулҳу созиш ташвиқ кунад, ки ин гурӯҳи мусаллаҳ барои баҳам задани интихоботи зудраси порлумонӣ талош дорад ва онро "тавтеаи Амрико барои тавҷеҳ кардани ишғоли кишвар" медонад.
Ҷангиён рӯзи 8 октябр гуфтанд, ҳар нафареро, ки ба раванди интихобот кӯмак мекунад ҳадаф қарор хоҳанд дод.
“Ҳалли воқеии бӯҳрони тӯлонии Афғонистон хуруҷи комили нерӯҳои ишғолгар ва барқарор кардани мустақилияти сирф исломӣ аст ”, – гуфт Забехуллоҳи Муҷоҳид, сухангӯи Толибон.
Дар ду моҳи ахир дастикам 8 номзади порлумони кишвар дар ҳамлаҳо кушта шуд.
Ҳафтаи гузашта дар вилояти Нангархори шарқи кишвар 18 иштирокчии гирдиҳамоии интихоботӣ аз инфиҷори як маргталаб ҷон бохтаанд. Масъулияти ин ҳамларо “Давлати Исломӣ” бар дӯш гирифт. гирифт.