ИА аз Русия талаб кард, ки Сентсовро фавран озод кунад
Вазорати корҳои хориҷии Иттиҳоди Аврупо ҳамчунин озодии тамоми шарҳрвандони Украинаро, ки ғайриқонунӣ дар Русияву Қрим нигаҳдорӣ мешаванд, матраҳ кардааст. Ин талаби асосии Сентсов ҳангоми гуруснанишиниаш буд.
Коргардони украинӣ бо гуруснанишинии худ "намунаи барҷастаи ҷасорат, қавииродагӣ ва худқурбонӣ аст” - омадааст дар изҳороти Иттиҳоди Аврупо. Масъулияти сари вақт ироа нашудани кӯмаки тиббӣ бар дӯши Русия гузошта шуд.
Олег Сентсов рузи 6 октябр гуфт, гуруснанишиниро ба ин хотир қатъ мекунад, ки мақомоти Русия мехоҳанд маҷбуран ба ӯ ғизо диҳанд. Ин нукта дар изҳороти хаттии Сентсов зикр шудааст, ки онро адвокаташ паҳн кард.
Муовини раҳбари Хадамоти федеролии иҷрои ҳукми ҷазо дар мусоҳиба бо “Известия” гуфт, ки духтурон вазъи саломатии Сентсовро пайгирӣ мекунанд. Ба гуфтаи ӯ, Сентсов аллакай ба навиштани сенарияи филми ояндаи худ “дар бораи буду боши зиндониён” пардохтааст. Ягон тасдиқи мӯътамади ин гуфтаҳо то ҳануз вуҷуд надорад.
Олег Сентсов аз ҷониби суди русӣ бо иттиҳоми тайёр намудани ҳамлаи террористӣ дар Қрим ба 20 сол маҳкум шуда буд. Ӯ ин ҳама иттиҳомотро инкор мекунад.