Гуруҳи Ҳамос Исроилро мушакборон кард
Нашрияи The Jerusalem Post менависад, яке аз мушакҳо ба автобус бархӯрда, дар натиҷа ҷавони 19-сола ҷароҳати сангин бардоштааст.
Ҷиноҳи мусаллаҳи Ҳамос гуфта буд, ки дар посух ба амалиёти неруҳои вижаи исроилӣ ин кишварро мушакборон мекунад. Дар натиҷаи амалиёти неруҳои исроилӣ шаби 12 ноябр 7 фаластинӣ кушта шуд.
Баъди ҳамлаи мушакӣ аз сӯи навори Ғазза, неруҳои низомии исроилӣ ҳам ба Ғазза ҳамла карданд. Дар ҳамлаи ахир ду фаластинӣ кушта шуд.