Муроҷиати писари Маҳмадалӣ Ҳаит барои раҳоии падараш. ВИДЕО
Фирӯзи Маҳмадалӣ рӯзи 23-уми сентябр дар яке аз нишастҳои машварат, гуфт, боздошту муҳокимаи падараш бо қонуншиканиҳои зиёд сурат гирифтааст ва гуруҳи Созмони Милал ҳам ба ин хулоса расида ва аз ҳукумати Тоҷикистон хостааст, ки ӯро раҳо кунад. Аммо ба гуфтаи Фирӯзи Маҳмадалӣ, “мақомоти Тоҷикистон ба ҷои иҷрои тааҳудоти худ барои риояти ҳуқуқ ва озодиҳои инсон, аз ҳар роҳе ба падари ман фишор меоранд, то аз тариқи телевизион ба зидди ҳамақидаҳояш изҳорот бидиҳад.”
Аммо пеш аз ин суханронӣ Шариф Қурбонзода, намоянда аз Додситонии кулли Тоҷикистон зимни суҳбат бо Радиои Озодӣ, иддаоҳо дар бораи бадрафторӣ бо Маҳмадалӣ Ҳаитро рад кард. Ӯ гуфт: "Вобаста ба он ки гӯё Маҳмадалии Ҳайит дар муассисаи ислоҳӣ шиканҷа шудааст, кормандони Прокуратураи генералӣ санҷиш гузарониданд. Дар моҳи март (2019) ҳама ҳолатҳо муайян карда шудааст. Дар вақти санҷиш дигар маҳкумшудагоне, ки дар ин муассиса адои ҷазо менамоянд, истифодаи шиканҷа нисбат ба Маҳмадалӣ Ҳайитро қатъиян инкор карданд.”
Фирӯзи Маҳмадалӣ, ки ҳоло дар яке аз кишварҳои аврупоӣ зиндагӣ мекунад, рӯзи 19-уми сентябр дар суҳбат бо Радиои Озодӣ айни суханронро гуфт, вале афзуд, ки маълумот дар бораи падарашро аз забони модар ва матбуот мешунавад, чун се сол боз падарашро надидааст. Ба қавли Фирӯзи Маҳмадалӣ, азбаски ба афроди маҳдуд иҷозаи мулоқот медодаанд, модару бибӣ ва бародари хурдиаш бештар бо Маҳмадалии Ҳаит мулоқот мекардаанд.
Маҳмадалии Ҳайити 62-сола, узви раёсати Ҳизби наҳзати исломиро соли 2015 бо гуноҳи даст доштан дар ошӯби нофарҷом ба раҳбарии Абдуҳалим Назарзода, муовини собиқи вазири дифоъ ба ҳабси якумрӣ маҳкум карданд. Мақомот гуфтанд, далелҳои собите доранд, ки ҳизб дар тарҳрезӣ ва барангехтани ошӯб даст дошт, худаш мегӯяд, ӯро танҳо барои дигарандешиаш ба зиндон андохтаанд.