Собиқ президенти Косово дар додгоҳи ҷиноятҳои ҷангӣ гуфт, “бегуноҳ” аст
Собиқ раиси ҷумҳурии Косово Ҳошим Точи нахустин бор дар баробари додгоҳе дар Гаага, ки ҷиноятҳои ҷангии замони истиқлолталабиҳои Косово аз Сербистонро муҳокима мекунад, ҳозир шуд. Ӯ солҳои 1998-99 фармондеҳи Артиши озодихоҳи Косово - як гурӯҳи шӯришӣ буд ва иттиҳомоте, ки додгоҳи ҷиноятҳои ҷангӣ баррасӣ мекунад, ба ҳамон солҳо бармегардад. Точи баъди дарёфти иттило дар бораи ин ки Додгоҳи ҷиноёти ҷангӣ ӯро дар содир кардани чандин ҷинояти даврони ҷанги 20 соли пеш айбдор мекунад, рӯзи 5-уми ноябр аз мақоми президенти Косово истеъфо доду дар баробари палатаи коршиносони Косово дар додгоҳи Гаага ҳозир шуд. Точии 52-сола рӯзи 9-уми ноябр бо костюму шими хокистаррангу галстуки сурх дар баробари додгоҳ қарор гирифт ва гуфт, “ман гунаҳгор нестам” ва бо иттиҳомоти марбут ба ҷиноёти ҷангӣ “розӣ нестам”. Точиву ду гумонбари дигар аз аъзои Артиши озодихоҳи Косово ҳамон шоми 5-уми ноябр ба додгоҳ интиқол ёфтанд. Собиқ президенти Косово ваъда дод, ки бо додгоҳ ҳамкорӣ мекунад. Додгоҳ дар навбати худ гуфт, ки мувофиқи муқаррарот бояд мутмаин бошад, ки “ҳуқуқи айбдоршавандаҳо, аз ҷумла, ҳуқуқ барои намояндагӣ аз онҳо, таъмин шудааст ва айбдоршавандаҳо дар бораи иттиҳоме, ки барои он посух медиҳанд, дарак доранд”. Ба ҳайати Палатаи коршиносони Косово дар додгоҳи Гаага чор додрас ва як намояндаи додситонӣ шомил ҳастанд.