Саакашвили иддао кард, ки дар Гурҷистон аст. ВИДЕО
Бо вуҷуди таҳдиди полиси Гурҷистон ба ҳабси собиқ президенти Гурҷистон, Михаил Саакашвили гуфт, ки ба ватан баргаштааст. Ӯ рӯзи 1-уми октябр дар Фейсбук як видеое нашр кард, ки дар он мегӯяд, ӯ дар шаҳри соҳилии Батумӣ қарор дорад.
Ин иддаоро феълан тасдиқ кардан имкон надорад, вазорати умури дохилии Гурҷистон то ҳол ин хабарро шарҳ надодааст. Саакашвили ҳоло сокини Украина аст ва ӯ чанд рӯз пеш гуфт, ки ният дорад рӯзи 2-юми октябр барои кӯмак дар “наҷоти кишвар” дар интихоботи маҳаллӣ ба Гурҷистон баргардад. Интихоботи парлумонӣ дар Гурҷистон 2-юми октябр барпо мешавад ва Саакашвилӣ дар интихобот аз мухолифон ҳимоят мекунад.
Ӯ дар ин изҳороташ акси як билетро ҳам нишон дода гуфт, ки шоми 2-юми октябр бо ҳавопаймо вориди Тифлис мешавад. Иракли Гарибашвили, нахуствазизири Гурҷистон он замон гуфт, ки полис баробари бозгашти Саакашвилӣ ӯро ҳабс карда ба зиндон меандозад.
Моҳи июни соли 2018 додгоҳе дар Гурҷистон Саакашвилиро дар ғайбаш ба шаш соли зиндон маҳкум кард. Дар ҳукми додгоҳ гуфта шуд, ки ӯ замони президентиаш ба сӯиистифода аз қудрат даст зада, ҳодисаи латукӯби як узви мухолифонро пинҳон кардааст.
Аз замони интихоботи соли гузашта дар Гурҷистон таниш дар равобити ҳизби ҳокими «Орзуи Гурҷистон» ва мухолифон пуршиддат боқӣ мемонад, чун мухолифон гуфтанд, ки интихобот тақаллуб шуд.
Нозирони маҳаллӣ он замон гуфтанд, ки интихобот пуррақобат гузашт ва дар маҷмӯъ озодиҳои бунёдӣ риоя шуд.
Ахиран ҳизби «Орзуи Гурҷистон» созиши сиёсӣ бо мухолифонро, ки бо миёнҷигии Иттиҳоди Аврупо имзо шуда буд, бекор кард ва ба даъвати интихоботи нав розӣ шуд.
Саакашвили солҳои 2000-ум дар мақоми президенти Гурҷистон кор кард ва соли 2013 ӯро дар як овоздиҳӣ аз мақом гирифтанд. Солҳои охир ӯ дар Украина дар мақомҳои мухталиф кор карда, як замон раиси вилояти Одесса ҳам буд.