Рақибони мунтахаби наврасони Тоҷикистон дар Ҷоми Осиё-2023 муайян шуданд
Мунтахаби футболи наврасони Тоҷикистон (U-17) бар асоси қуръакашии марҳилаи ниҳоии Ҷоми Осиё-2023 байни дастаҳои наврасони то 17-сола, ки 30-юми март дар Тайланд баргузор шуд, дар гурӯҳи «С» бо тимҳои Австралия, Арабистони Саудӣ ва Чин бозӣ мекунад.
Дар ҷараёни қуръакашӣ 16 даста ба чаҳор гурӯҳ – «А», «В», «С» ва «D», ки ҳар кадом аз чаҳор тими мунтахаб иборат аст, тақсим шуд.
Бояд гуфт, пас аз натиҷагирии Ҷоми Осиё-2023 миёни наврасон чаҳор дастаи беҳтарин соҳиби роҳхат ба Ҷоми ҷаҳон-2023, ки аз 15-уми июн то 2-юми июл дар Тайланд баргузор мешавад, роҳхат мегирад.
Натоиҷи қуръакашии марҳилаи ниҳоии Ҷоми Осиё-2023 байни дастаҳои наврасон (U-17):
Гурӯҳи «А»: Тайланд, Яман, Малайзия, Лаос.
Гурӯҳи «В»: Кореяи Ҷанубӣ, Эрон, Афғонистон, Қатар.
Гурӯҳи «С»: Тоҷикистон, Австралия, Арабистони Саудӣ, Чин.
Гурӯҳи «D»: Ҷопон, Ҳиндустон, Ветнам, Узбекистон.
Ёдовар мешавем, дастаи мунтахаби наврасони то 17-солаи Тоҷикистон бо роҳбарии сармураббӣ Раҳматулло Фузайлов дар доираи омодагӣ ба қисми ниҳоии Ҷоми Осиё-2023 рӯзи 21-уми март дар шаҳри Даммоми Арабистони Саудӣ бозии санҷишӣ анҷом дод. Бозӣ бо ҳисоби мусовии 2:2 хотима ёфт.
Нимаи аввали дидор бо ҳисоби 2:0 ба фоидаи мунтахаби наврасони Тоҷикистон ба поён расид. Голҳоро Шаҳбон Наимов ва Абубакр Сулаймонов заданд. Вале дар нимаи дуюми дидор мунтахаби наврасони Арабистони Саудӣ (U-17) ҳисобро баробар кард.
Ҷамъомади дуҳафтаинаи таълимию тамринии мунтахаби наврасони Тоҷикистон (U-17) дар Даммом то рӯзи 30-юми март идома кард. Ба ин ҷамъомад сармураббии дастаи мунтахаби наврасони Тоҷикистон (U-17) Раҳматулло Фузайлов 27 бозигар – 3 дарвозабон, 6 ҳимоятгар, 13 нимҳимоятгар ва 5 ҳамлагарро даъват намуд.
Ҳайати дастаи мунтахаби наврасони то 17-солаи Тоҷикистон дар ҷамъомади таълимиву тамринӣ дар Арабистони Саудӣ:
дарвозабонҳо: Сунатулло Исмоилов, Муҳаммад Абдулҳадов, Абубакр Маҳмудов;
ҳимоятгарон: Баракатулло Неъматуллозода, Шеравган Саидов, Қамариддин Ғаффорзода, Диловар Ҷамшедзода, Рустам Камолов, Амири Фарҳод;
нимҳимоятгарон: Абубакр Саидов, Меҳрубон Ҳамидов, Муҳаммадҷони Тоҳирӣ, Бахтовар Ғаюров, Абубакр Сулаймонов, Аҳмадҷони Абдусатторӣ, Муҳаммад Қурбонов, Ҷовидон Хушвахтов, Миқдод Розиқов, Хоҷӣ Абдуманон, Шаҳбон Наимов, Муродҷон Ҷалилзода, Шерзод Қаҳҳоров;
ҳамлагарон: Ориёнмеҳри Нуриддин, Билол Бобоев, Раббонӣ Камолов, Масрур Ғаюров, Юнус Исматуллоев.
Сармураббӣ – Раҳматулло Фузайлов