Browder: Tramp meni yzarlamakda rus prokurorlaryna kömekleşmäge razy bolana meňzeýär
Britan maýadary we hukuk aktiwisti William Browder ABŞ-nyň prezidenti Donald Trampyň rus prezidenti Wladimir Putin bilen duşuşygy mahalynda rus hukuk goraýjylarynyň özüni yzarlamagyna kömek bermek barada ylalaşan bolmagynyň ahmaldygyny aýdýar.
Browder twitter postunda we 17-nji iýulda “Time” žurnalynda çap edilen makalasynda Putiniň özüne çykmak isleýändigini, muňa derek geçen hepde 2016-njy ýylyň prezident kampaniýasy döwründe Trampy güýçlendirmek üçin ABŞ-nyň demokratik dokumentlerini ogurlamakda aýyplanan 12 rus aňtaw ofiseriniň hödürlenýändigini aýtdy.
"Putin Halsinkide Tramp bilen duşuşanda, ABŞ saýlawlaryna hakerlik eden 12 rus aňtaw agentini meniň bilen çalyşmak isledi” diýip, Browder twitterde aýtdy. Ol Trampyň 16-njy iýuldaky sammitde bu ideýa “tassyklaýjy” baş atyp, ylalaşan ýaly görnendigini, soňra muny “ajaýyp teklip” diýip häsiýetlendirendigini aýtdy.
"Bu boş haýbat däl. Soňky on ýylyň dowamynda men Putin režimi tarapyndan öldürilmekden sypmaga çalyşýaryn” diýip, Browder aýtdy.
Ol Putiniň Magnitskiý kanunlary diýilýäniň günbatar ýurtlarynyň bir toparynda öňe iterilmegi üçin öç aljak bolýandygyny aýtdy. Bu kanun Orsýetde we beýleki ýurtlarda adam hukuklaryny bozanlaryň garşysyna sanksiýa girizilmegine ygtyýar berýär.