Wise-premýer Meredow Berdimuhamedowa Moskwada baýrak alan kitabynyň diplomyny gowşurdy

Türkmen döwlet neşirýat gullugy tarapyndan neşir edilen kitaplaryň dördüsi GDA ýurtlarynyň “Kitap sungaty” 15-nji halkara bäsleşiginiň abraýly baýraklaryna mynasyp boldy diýip, TDH 10-njy sentýabrda çap eden habaryny ýene bir gezek gaýtalady.


Neşiriň maglumatyna görä, 31-nji Moskwa Halkara kitap sergi-ýarmarkasynyň çäklerinde geçirilen bäsleşikde prezident Gurbanguly Berdimuhamedowyň “Türkmenistan — Beýik Ýüpek ýolunyň ýüregi” atly kitaby “Medeniýetleriň söhbedi” ugrunda I derejeli diploma mynasyp boldy. 


Bu diplom anna güni, hökümet maslahatynyň dowamynda, wise-premýer, daşary işler ministri Reşit Meredow tarapyndan döwlet baştutanyna "dabaraly ýagdaýda gowşuryldy".


Golaýda fran­suz kom­pa­ni­ýa­la­ry­nyň ýol­baş­çy­la­ry­ Berdimuhamedowa onuň bu kitabynyň fran­suz di­li­ne ter­ji­me edi­len nusgasyny sow­gat be­rdiler.


Mundan öň TDH “Meniň ýurdum” nominasiýasy boýunça abraýly bäsleşigiň ýeňijileriniň hataryna “Arkadag taglymaty — sagdynlygyň, ruhubelentligiň binýady” atly kitabyň – ýagny G.Berdimuhamedow hakyndaky eseriň hem girendigini habar beripdi.


Neşiriň maglumatyna görä, “Çagalar we ýetginjekler üçin kitaplar” nominasiýasynda “Türkmen halk ertekileri” atly kitap 2-nji derejeli diploma eýe boldy; “Okuw edebiýaty we bilim” nominasiýasy boýunça “Gürgenç — Gündogaryň orta asyrlar döwrüniň ylmy we medeni merkezi” atly kitap 3-nji derejeli diploma eýe boldy.


Türkmenistanda basym 27 ýyllygy belleniljek garaşsyzlyk ýyllarynda esasan iki ýazyjynyň – Saparmyrat Nyýazowyň we Gurbanguly Berdimuhamedowyň kitaplary köp çap edildi we öwüldi.


Prezident Berdimuhamedow 2007-nji ýylda prezident bolaly bäri 40 töweregi kitap ýazdy we olaryň köpüsi birbada üç dilde - türkmen, rus we iňlis dillerinde çap edildi.


Şol bir wagtda Türkmenistanda okuw kitaplarynyň ýiti ýetmezçilik edýändigi, onlarça ýazyjynyň adynyň “gara sanawa” girizilip, kitaplarynyň asla çap edilmeýändigi aýdylýar.