Täjigistanyň transport ministriniň öz janyna kast etmek synanyşygynyň käbir sebäpleri aýan bolýar
Täjigistanyň Baş prokuraturasynyň mälim etmegine görä, 11-nji awgustda ýüze çykan bu hadysa maşgalada dörän konflikt sebäp bolupdyr.
«62 ýaşly Hudoýor Hudoýorzoda maşgala agzalary bilen dawalaşandan soň, ýaşaýan ýeri Duşenbe şäherinde özüni öldürmek üçin, aşhanadaky pyçak bilen özüni ýaralapdyr» diýip, Täjigistanyň Baş prokuraturasynyň 11-nji awgustdaky maglumatynda aýdylýar.
Çeşmäniň aýdyşyna görä, Hudoýorzodanyň aýaly hem maşgala agzalary şol wagtda öýde bolansoň, ýagdaýy görüp, oňa ilkinji medisina kömegini beripdirler.
«Häzirki wagtda Hudoýorzoda “Istiklol” keselhanasynda bejergi alýar. Hirurgiýa operasiýasyndan soň, onuň ýagdaýy kanagatlanarly, wraçlaryň gözegçiliginde galýar» diýip, Täjigistanyň Baş prokuraturasynyň habarynda aýdylýar.
Kanun gözegçiligi edarasy Azatlyk Radiosynyň žurnalistine bolan ýagdaýy tassyklady hem hadysa boýunça jenaýat işiniň açylandygyny mälim etdi. Häzir derňew işleriniň barýandygy sebäpli, derňew gutarýança, hadysanyň ýüze çykmagy barada kommentariýa bermekden saklanýandygyny-da mälim etdi.
Ýokary wezipeli çinownigiň maşgala agzalaryndan hem düşündiriş almak başartmady. Ministriň gapysyny ýaş ýigit aýdy. Bolan ýagdaý barada žurnalistiň sowalyna ýuwdunyp durdy-da, “hiç zat bolanok” diýip, çalt gapynyň aňrysynda ýitirim boldy.
Hudoýor Hudoýorzodanyň aýal dogany Azizahonym Azatlyk Radiosynyň telefon gepleşiginde, doganynyň keselhana ýerleşdirilendigini eşidendigini, ýöne onuň bilen näme bolanyndan habarsyzdygyny aýtdy.
“Istiklol” medisina merkeziniň ýolbaşçylary Transport ministriniň saglyk ýagdaýy barada resmi maglumat bermekden ýüz öwürdiler. Ýöne wraçlardan biri gizlinlik şerti bilen Hudoýorzodanyň garnyndan iki gezek pyçak bilen ýaralanandan soň, keselhana getirilendigini mälim etdi.
Häzirlikçe beýleki çeşmeler bu maglumaty tassyk etmediler we ýalana-da çykarmadylar.
Ministriň öz janyna kast etmegi olaryň goňşularyna ýiti täsir edipdir, olar ýüze çykan ýagdaýy sosial ulgamdan bilipdirler. «Ol öz janyna kast eder diýseler, hiç kim ynanmaz» diýip, ministriň goňşularyndan biri aýdýar.
Mähelledäki jaýlar toplumynyň ýolbaşçysy Arusmo Pirowa Azatlyk Radiosy bilen gürleşende, ministriň öz janyna kast etmegi baradaky habary eşidenden soň, onuň öýüne barandygyny aýdýar. «Hudoýorzodanyň aýalynyň gan basyşy örän ýokary eken, ol gepleşmäge ýaramady. Men başardygymdan, ministriň gyzyny köşeşdirmäge çalyşdym. Bizde ministriň maşgalasy örän göreldeli saýylýar, olarda öň konflikt bolmandy, ol hem onuň aýaly örän gowy adamlar bolmaly. Hudoýorzodanyň özüni pyçaklandygyny eşidenimde, muňa gaty geň galdym» diýip, Pirowa gürrüň berdi.
Hudoýor Hudoýorzoda transport ministrligine 2017-nji ýyldan bäri ýolbaşçylyk edip gelýär. Mundan öň ol Dagly-Badahşan awtonom oblastynyň mejlisiniň deputaty bolupdy, Täjigistanyň parlamentiniň ýokary öýi – Majlisi Millide agza hem Ruşan raýonynda jogapkär wezipede işledi.
Täjigistanyň Baş prokurory Ýusuf Rahmon şu ýylyň aprel aýynda Majlisi Millide çykyş edip, 2019-njy ýylda ýurt boýunça öz janyna kast etmek synanyşygyna degişli 632 faktyň bardygyny aýtdy. Onuň sözüne görä, bu çäräniň öňüni almak üçin, hökümet ýörite programma kabul edipdir hem özüni öldürmäge synanyşýanlar bilen profilaktika çärelerini geçirmek göz öňünde tutulýar. Ol maksatnama 2023-nji ýyla çenli amala aşyrylar.
Bilermenleriň aýtmagyna görä, Täjigistanda özüni öldürmäge ýüz urýanlaryň esasy sebäbi maşgalada ýa-da iş ýerinde döreýän gapma-garşylyk, maddy ýetmezçilikleriň kynçylygy, gabanjaňlyk, psihiki keseller hem narkomaniýa bolup durýar.
Material AÝ/AR-nyň Täjik gullugy tarapyndan taýýarlandy.