ÝHHG-nyň metbugat wekili türkmen ilçisinden tussag edilen blogçyny sorady
"Türkmenistanyň Hronikasy" guramanyň web sahypasyna salgylanyp habar berýär.
Ribeiro Türkmenistana baryp görmäge gyzyklanma bildirdi we Türkmenistanyň metbugat azatlygy we söz azatlygy babatda öz üstüne alan borçlaryny durmuşa geçirmegi üçin öz edarasynyň berip biljek hünärmen kömegini teklip etdi.
Ilçi Nurberdiýew ÝHHG-nyň wekiline Türkmenistanyň adam hukuklary boýunça öz üstüne alan borçnamalarynyň ählisini ýerine ýetirmäge doly ygrarly bolup galýandygyny aýtdy we Ribeirony onlaýn žurnalistikasynyň we aragatnaşygyň ösüşi bilen meşgullanýan täze türkmen edarasynyň işine gatnaşmaga çagyrdy.
Neşir Ribeironyň bu çakylygy kabul edendigini habar berýär.
ÝHHG-nyň metbugat azatlygy pudagyndaky ýagdaýa yzygiderli gözegçilik edýändigini aýdyp, Ribeiro ilçiden 2020-nji ýylyň sentýabr aýynda iş kesilen blogçy Nurgelda Halykowyň işi barada goşmaça maglumat bermegini sorady.
Türkmen ilçisiniň bu haýyşa näme jogap berendigi aýdylmaýar.
"Turkmen.news" neşiriniň maglumatyna görä, 26 ýaşly Halykow dört ýyl azatlykdan mahrum edildi. Resmi taýdan ol kezzaplykda aýyplandy, ýöne neşir onuň hakykatda 2020-nji ýylyň iýulynda BSG-nyň Aşgabada gelen wekilleriniň suratyny žurnalistlere iberenden soň tussag edilendigini aýdýar.