Albaniýa Eýrany täze kiber-hüjümde aýyplaýar
Albaniýa özüne garşy täze kiber-hüjümiň amal edilendigini aýdýar. Içeri işler ministrligi 10-njy sentýabrda hüjümiň arkasynda Eýranyň durandygyny aýtdy. Mundan birnäçe gün ozal, birinji kiber-hüjümiň netijesinde Tirana Tähran bilen diplomatiki baglaryny kesipdi.
Ministrligiň maglumatyna görä, 8-nji sentýabrda üsti açylan hüjüm Albaniýanyň milli polisiýasynyň kompýuterlerine garşy gönükdirilipdir.
“Resmiler jenaýatçylykly hereketiň öňüni almak we ulgamlaryň howpsuzlygyny üpjün etmek maksady bilen, deňiz portlaryndaky, aeroportlardaky we serhet araçäklerindäki kompýuterleri öçürdi” diýip, ministrligiň beýanatynda aýdylýar.
Premýer-ministr Edi Rama nobatdaky hüjümiň “şol öňki agressor” tarapyndan amal edilendigini aýtdy.
Mundan ozalky kiber derňewiň netijeleri boýunça, Albaniýa 7-nji sentýabrda ähli eýran resmileriniň ýudy terk etmelidigini aýtdy we Tähran bilen diplomatiki gatnaşyklaryny ýitileşdirdi.