Eýranyň Mugallymlar bileleşigi öldürilen okuwçylaryň ýasyny tutýar
Eýranyň Mugallymlar bileleşigi "adalaty gözleýänleriň adalatsyzlykda dökülen gany we eýranly studentleriň namartlarça öldürilmegi" sebäpli iki günlük ýas çäresiniň geçirilýändigini yglan etdi.
Mugallymlar sindikatlarynyň utgaşdyryjy geňeşi 20-nji oktýabrda çap eden beýanatynda golaýda hökümete garşy geçirilen protestleriň “dowamly basylyp ýatyrylan” wagtynda häkimiýetleriň “şu wagta çenli bir topar okuwçynyň we çaganyň şirin janyny iň rehimsiz ýagdaýda alandygyny” aýtdy.
Geňeş öň telegramda 16 ýaşly Asra Panahiniň 13-nji oktýabrda Ardabildäki gyzlar mekdebine howpsuzlyk güýçleri tarapyndan geçirilen reýdden soň ölendigini tassyk edipdi.
Geňeşiň maglumatyna görä, Panahi Ardabil şäheriniň resmileri studentleri hökümete tarapdar ýörişe gatnaşdyryp, olardan ýokary lider Aýatolla Ali Hameneýini wasp edýän aýdymy aýtmagy soranlaryndan soň öldi.
Okuwçylar garşylyk görkezenlerinden soň, howpsuzlyk güýçleri olara hüjüm etdiler. Azyndan ýedi adam ýaralandy. Habar berilmegine görä, Panahi 14-nji oktýabrda, keselhanada aradan çykypdyr.
Hijabyny düzüw geýmezlikde aýyplanan 22 ýaşly Mahsa Amini 16 sentýabrda polisiýa tussaglygynda ýogalandan soň dörän gozgalaňlar sebäpli, Eýran 1979-njy ýyldaky rewolýusiýadan bäri Yslam režimine garşy görkezilýän iň uly garşylyklaryň biri biri bilen ýüzbe-ýüz bolýar.