5 biñ Qırım sakinini qanunsız olaraq Rusiye ordusınaki hizmetke çağırdılar – aq-uquq qorçalayıcısı
2017 senesiniñ soñundaki vaziyetke köre, ilhaq etilgen Qırımnıñ 5 biñge yaqın sakini muddetli hizmet içün Rusiye ordusına çağırıldı. Muddetli arbiy hizmetke çağırılğan gençlerniñ sayısında artuv közetile. Bunı Qırım.Aqiqat Radiosınıñ canlı yayınında Qırım aq-uquq qorçalayıcıları grubunıñ azası İrina Sedova bildirdi.
Onıñ aytqanına köre, yarımadada Rusiye ordusında hizmet etüvden qaçınğanlarğa qarşı cinaiy işler açılıp başladı.
Sedova: «Biz şimdi tamam böyle vaziyetlerde yapılacaq areketler boyunca tevsiyeler işlep çıqamız. Bundan qaçınmaq içün tek bir yol bar – arbiy hizmet içün qayd etilmemek. O zaman yalıñız memuriy iş açacaqlar. Lâkin bunı yapmaq pek qıyın, çünki şimdi arbiy hizmet içün em mekteplilerni, em sturdentlerni kütleviy surette qayd eteler. Meselâ, sabıq TMU, şimdiki «Qırım federal universiteti»nde arbiy hizmet içün qayd etilmegenlerge diplomlar bile berilmey», – dedi.
Aq-uquq qorçalayıcısı, ondan ğayrı Qırım arbiy komissariatlarınıñ hadimleri Ukrainanıñ qıtadaki qısmına ketken gençlerni tapıp, olarnı qıdıruvğa berecekleri ile qorquzalar.
Sedova: «Qırımnıñ özünde orduğa çağırıluv bir bayram kibi teşkil etile, ve bir çoq adam buña aldana, soñundan ise dayanılmaz şaraitlerden zorluq çekeler», – dedi.
Qırım aq-uquq qorçalayıcıları grubu Qırım sakinlerine, ilhaq etilgen yarımadadan Rusiye ordusına çağırıluv faktları aqqında haber bermek ricası ile muracaat etti.
Qırım ilhaq etilgen soñ Rusiye akimiyeti Qırım sakinlerini öz ordusınıñ saflarına ala. Yarımadada pek çoq kütleviy tedbirlerde Rusiye Silâlı quvetlerinde hizmet etüv propagandası yapıla. Halqara qanunları ve BMT Baş Assambleyasınıñ qararlarına rağmen Qırım sakinlerini Rusiye ordusında hizmet etmege davet eteler.