Qırımtatarlar balalarınıñ milliy sınıflarda oqutulmasını daa faal bir sürette talap etmeli– faal
Qırımtatarlar öz balalarınıñ milliy sınıflarda oqutma fırsatını yetecek seviyede qullanıp olamaylâr. Bu aqta qırımtatar faalleriniñ Suvdağda keçken toplaşuvda qırımtatar milliy areketiniñ faali Nariman Celâl beyan etti, dep bilidire Qırım.Aqiqat muhbiri.
«Rusiyeniñ tasil qanunına binaen bizler balalarımıznıñ qırımtatar milliy sınıflarında tasil almasını talap etme aqqına saipmiz. Afsus ki, bu resurs eksik qullanılmaqta. Ondan da ğayrı, mektepte ana-babalarnı balalarınıñ milliy sınıflarda tasil almaması içün arizalar yazmağa işandırğanlarınen bağlı vaqialardan haberdarmız», – dep ikâye etti Celâl.
Rusiyeli KHV yazğanı kibi, daa evel, Rusiye nezaretindeki Qırım tasil, ilim ve gençlik naziri Natalya Gonçarova bilidirgenine köre, Qırım sakinlerini 5,4 biñi (talebeler umumiy sayısınıñ 3%) qırımtatar tilinde, 371 bala (talebeler umumiy sayısınıñ 0,2%) ukrain tilinde tasil ala eken. Qırımtatar tilinde tasil bergen on beş, ukrain tilinde ise 1 mektep faaliyet köstermektte eken. Bunen bir sırada 30%den ziyade mektepte qırımtatar ya da ukrain tillerinde tasil berile eken. Gonçarova, til ögrenilmesi içün kitap ya da dershaneleryetişmemesi kibi bir problema olmağanını qayd ete.
«Biz emsali olmağan yañı sınıflar açmaqtamız. Atta o da bu tilde tasil almağan istegen yedi ya da sekiz bala olsa da», – dep bildire rusiyeli KHV Qırım tasil nazirligi yolbaşçısınıñ sözlerini.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü olaraq qabul etti.