NATO komandanı: Rusiye sebebinden ittifaq bazı saalarda «üstünligini» ğayıp ete bile
Eger NATO arbiy quvetlerini modernleştirip olamasa ve Rusiye tarafından kelgen tehlükege qarşı munasip çareler tapmasa, beş yıldan soñ bazı saalarda «üstünligini» ğayıp ete bilecek. Bunı Şimaliy Atlantika ittifaqınıñ Avropadaki komandanı general Kertis Skaparotti NATO Arbiy komitetiniñ oturışuvında söyledi.
Skaparotti: «Fikrimce, bir ittifaq olaraq bizim üstünligimiz bar. Bizge meydan oqulğan bazı saalar bar. Fikrimce, kiberboşluq olardan biridir. Olarnıñ (ruslarnıñ – muarririyet) bu işte büyük salâhiyeti bar», – dedi.
O, NATO Arbiy komitetine muracaat etip, «Rusiyeniñ strategik raqip olaraq canlanması, Afrika ve Yaqın Şarqta artqan telüke ve stabilsizlik, em de terrorizm bizim strategik muitimizni temelden deñiştireler», dep qayd etti.
Rusiye tarafından Ukrainağa ait Qırım yarımadasınıñ ilhaq etilmesi ve Ukrainanıñ şarqındaki çatışmanıñ başlanmasından soñ Moskva ile Ğarp devletleri arasında munasebetler keskinleşti. Kyiv ve Ğarp Rusiyeni separatistlerge silâlı yardım etkeninde qabaatlay. Kreml bu qabaatlavlarnı inkâr ete ve Donbassta olsa bile, rusiyeli «göñülliler» bardır, dey. BMTniñ malümatına köre, çatışma esnasında 10 300-den ziyade kişi elâk oldı.