Qırımda mahkeme Aqmescitteki «Hizb ut-Tahrir işi» iştirakçisiniñ qadını Abullayevanı para cöremesinen cezaladı

Kreml nezareti altındaki Aqmescit Sulh mahkemesi «Hizb ut-Tahrir işi» iştirakçisiniñ mahkeme icracısına tabi olmağanında qabaatlanğan ömür arqadaşı Fera Abdullayevanı, 500 rublelik para cöremesinen cezaladı. Bıu aqta fevralniñ 21-nde Azatlıq Radiosınıñ muhbiri haber etmekte.

Oturışuv esnasında Abdullayevanıñ imayecisi Lilâ Gemeci, icracınıñ mahkeme binasını terk etüvinen bağlı talabı qanunsız olğanını qayd eterek: «O, ictimaiy tertipni bozmadı, amma icracınıñ areketleri onıñ qadınğa qarşı olğan şahsiy raatsızlığınen bağlı», - dedi.

 «Bütün samimiyetnen bu vaziyetni al etmege areket etkeniñizmi körem, qara çıqarmaqta da zorlanasıñız. Lâkin men aldatmayım, men musulmanım, dinim aldatmaqnı yasaqlay, men Allahtan qorqam», – dep muracaat etti Abdullayeva sulh mahkemecisine.

Protokolnı tizgen Sergey Berezko, mahkeme fevralniñ 6-nda, uquq bozıluvı olmağanı sebebinden, Fera Abdullayevağa nisbeten açılğan memuriy işniñ qapatıluvınen bağlı qararnen razı olmağanı içün, şikâyet bergen edi. Mahkeme bu şikâyuetni fevralniñ 15-nde baqtı.

Abdullayevaniñ ictimaiy imayecisi Lilâ Gemeciicracınıñ şikâyetinen razı olmağan edi.

«Sulh mahkemecisi protokol tizgen icracı ve şaatlıq yapqan diger icracılarnıñ malümatlarına doğru qıymet kesti ve olar biri-birine zıt kele. Mahkemeci Yuqarı mahkeme binasındaki videoqaydlarnı istegen edi, ancaq olar taqdim etilmedi. İcracı, imayem altındaki şahısnıñ qabaatsız olğanı isbatlanmaması içün, qaydlarnı gizlegen edi», – dep qayd etti Gemeci.

Dekabrniñ 8-nde onıñ qocası Uzeir Abdullayevniñ tevqif müddetinen alâqalı qarar çıqarılmasınen bağlı mahkeme oturışuvına kirmege areket etken Fera Abdullayeva, özüni qabaatlı dep saymağanını beyan etti.

 «İcracı aytqanı kibi men ne qıçırdım, ne de qavğa ettim. Men qocamnen bağlı qararnıñ ilân etilgenini eşitmege istep, mahkemecini bekley edim. Ancaq icracı menim mahkemede bulunmağa esas yoq dep, meni aydap çıqarmağa başladı. Eninde-soñında men çıqtım, lâkin uquq bozacaq iç bir areketyapmadım», – dep qayd etti o.

2017 senesi dekabrniñ 8-nde, «Hizb ut-Tahrir işi» boyunca ötkerilgen nevbetteki qapalı oturışuv vaqtında, Abdullayeva Qırım Yuqarı mahkemesiniñ ekinci qatındaki meydanqta tura eken. Mahkeme icracıları onı birinci qatqa enmege rica eteler. O, red etken soñ, onı tutıp, memuriy protokol tizeler.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.