Ukrainada AQŞ elcisi: Vaşington Qırımdaki Rusiye prezidentiniñ saylavını tanımaycaq
Ukrainada AQŞ elcisi Mari Yovanoviç, Vaşington ilhaq etilgen Qırımda da ötkerilmesi planlaştırılğan Rusiye prezidentiniñ saylavını tanımaycaq, dep bildirdi. Bunı o, Ukrainadaki «Prâmoy» kanalınıñ efirinde söyledi.
Yovanoviç: «Menim fikrimce, Qırımda bütün saylavlarğa qarşı olğanı kibi – bu saylavlarnı evelden iza etkenimizde qullanğan usulımızğa köre, biz olarnı tanımadıq», – dedi.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik şurası ve Baş assambleyası, Avropa Birligi, NATO, halqara teşkilâtlar, çetel parlamentleri ve ükümetlerini ilhaq etilgen Qırım territoriyasında keçirilmesi taqdirde Rusiye prezidenti saylavlarınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.