Ukraina Medeniyet nazirligi qırımtatar örnegini medeniy miras cedveline kirsetti (+ foto)
Medeniyet nazirliginde, örnekniñ içine esas olaraq ösümlikler tarzında ve geometrik harakterinde olğan simmetrik ve assimetrik şekilde yerleştirilgen birleşken küçük elementler kire, dep añlattılar. Aynı vaqıtta örnekniñ farqlı elementleri umumiy manalı merkezge birleşip, bir-birini quvetlerştire ya da yañı işaretlerni teşkil eteler.
Muessiseniñ bildirüvinde: «Ananeviy örnekniñ tasviri, qırımtatar halqınıñ medeniyetindeki eñ qadimiy eserler sırasına kire. O, dünya medeniyetiniñ tekrarlanmaz adisesidir. O, mevzuatı ve simvolikası ile Qırımnıñ qadimiy tarihı, bu topraqlardan keçken skiflerniñki, antik, Vizantiya ve türklerniñki kibi bütün medeniyetler ile bağlıdır. Qırımtatarlarnıñ dekorativ sanatı XV asırnıñ ekinci yarısından XVIII asırnıñ soñuna qadar devam etken Qırım Hanlığı devrinde eñ parlaq noqtasına irişti. Qırımtatarlarnıñ ornamental sanatı doğdı, uzun ve murekkep bir sintez yolunı keçti, inkişaf etti ve inkişaf etmege devam ete», – denile.
Medeniyet nazirliginde, qırımtatar örnegi ve onıñ elementleri bezekler olaraq esas itibarı ile nağışta, urbada, ayaqqaplarda, baş kiyimlerinde, türlü aksessuarlar çeşitlerinde, quyumcılıq eserlerinde ve turmuş eşyaları: keramik ve maden savutlar, ağaç eşyalar, ev eşyaları, mebel bezetilmeleri ve kilim töşemelerinde qullanılalar. O, muim bir özüni tanıma elementi, er bir qırımtatar qorantasınıñ ayatındaki ayırılmaz bir parçadır.