Qırımda Timur Şaymardanovnıñ ğayıp olması aqqında iş boyunca mahkeme oturışuvı ekinci kere başqa künge keçirildi – advokat

Aqmescitte mahkeme, tahqiqatçınıñ kelmegeni sebebinden, tahqiqatnıñ Timur Şaymardanovnıñ ğayıp olmasına dair areketleri aqqında iş boyunca oturışuvnı ekinci kere başqa künge keçirdi. Bunı aprel 19-da advokat Emil Kurbedinov bildirdi.

Advokatnıñ malümatına köre, kelecek sefer oturışuv 2018 senesi aprel 25 künü saat 12:00-ge tayin etildi.

Evelden bildirilgenine köre, aprel 13-te mahkeme, prokuror ve tahqiqatçı kelmegenleri sebebinden Şaymardanovnıñ ğayıp olması aqqında iş boyunca oturışuvnı başqa künge keçirdi.

2014 senesi mayısnıñ soñunda Aqmescitte, yarımadanıñ arbiy istilâsına qarşı narazılıq tedbirleriniñ faal iştirakçileri Timur Şaymardanov ve Seyran Zinedinov habersiz ğayıp oldılar. Olarnıñ ğayıp oluv vaqiası boyunca em Qırımda, em de Ukrainanıñ qıtadaki qısmında cinaiy işler açıldı, lâkin şimdilik tahqiqat iç bir netice bermedi.

Qırımnıñ ilhaqından soñ yarımadada esasen qırımtatarlar arasında insanlarnıñ ğayıp oluvı vaqiaları daa sıq olıp başladı. Aynı zamanda Rusiyeniñ kontroli altında olğan Qırım Tahqiqat komitetinde, «yarımadada qırımtatarlarnıñ kütleviy surette ğayıp oluvı yoq», dep iddia eteler.

Qırım insan aqlarını qorçalav gruppası, alıp qaçuvlar Rusiye ukümeti, ya da olarnıñ kontroli altında olğan paramilitar gruppalar tarafından yapıldı, dep tahmin eteler. Kremlniñ kontroli altında olğan Qırım ukümeti, de facto ğayıp oluv vaqialarını tanıy, lâkin olarğa özüniñ alâqası olğanını inkâr ete.