Kyivde, Qırımda alıp qaçılğan Ervin İbragimovğa qol tutmaq içün futbol oynadılar (+ foto)
Bunı Qırım.Aqiqat muhbiri bildire.
Açış sözleri ile Qırımtatar Milliy Meclisiniñ reisi Refat Çubarov, Qırımtatar Milliy Meclisi reisiniñ muavinleri Ahtem Çiygoz ve İlmi Umerov çıqışta bulundılar. Olar böyle tedbirlerniñ emiyetini qayd etti ve tezden Ervin Umrov bulunğan yeriniñ belli olacağına umütlerini bildirdiler.
Çubarov: «Eminim ki, bizim böyle birleşmelerimiz, toprağımızğa kelgen bütün bu belâlarnıñ yoq olmasına ketirecekler. Halqımız ise, Ervin ve Qırımda yüz biñlerce faaliyetçilerniñ sayesinde bu sınavdan daa qaviy ve maqsatkâr olıp çıqacaq», – dedi.
Matçnıñ arfesinde «QırımSOS» cemiyet teşkilâtınıñ koordnatorı Tamila Taşeva jurnalistlerge, bu qarşılaşuvnıñ İbragimov ve diger siyasiy mabüslerniñ qorantalarına qol tutmaq içün yapılğanını söyledi.
O: «Bu matç – Ervinge, onıñ qorantasına ve diger zornen alıp qaçılğan insanlarnıñ qorantalarına qol tutuvdır. Biz, iç olmazsa, ayda bir kere o alıp qaçuvlar, işğalci ukümet terefından işlengen cinayetler aqqında hatırlatmağa tırışamız. Bu sefer biz onı Rusiye elçihanesiniñ divarları yanında degil de, Ervin içün muim olğan simvolik tarzda keçirdik. O, futbol aveskârı edi», – dep ikâye etti.
Taşeva, İbragimovnıñ sağ-selâmet olğanına ve yaqın vaqıtta «özü oynap, bütün yigitlerge minnetdarlığını bildire bilecegine» umütini bildirdi.
Matç 2:2 esabınen yekünlendi.
Oyun Şevçenko adına Kyiv milliy universitetiniñ sport kompleksi bazasında Qırımtatar Milliy Meclisi, «QırımSOS» insan aqlarını qorçalav teşkilâtı ve cemiyet faaliyetçileriniñ qol tutuvı ile keçti.
2016 senesiniñ mayısında Bağçasarayda belli olmağan şahıslar Dünya Qırımtatar Kongressi icra komitetiniñ azası Ervin İbragimovnı alıp qaçtılar. Videoközetüv kamerası, Rusiye yol inspektorları uniformasını kiygen eki kişiniñ, İbragimovnıñ maşinasını toqtatıp, özüni öz mikroavtobuslarına zornen kirsetkenlerini qayd etti.
Qırım insan aqlarını qorçalav gruppası, bu alıp qaçuvnıñ Rusiye ukümeti ya da onıñ kontroli altında olğan paramilitar gruppalar tarafından yapılğanını tahmin ete.
Rusiye Tahqiqat komitetiniñ Qırım boyunca Rusiyege tabi idaresi alıp qaçuv boyunca cinaiy iş açtı, lâkin Ervin İbragimovnıñ bulunğan yeri aqqında malümat bu küngece yoq.