Qırımdaki tintüvlerden soñ ğayıp olğan faal Yayaçikovnıñ bulunğan yeri alâ daa belli degil – jurnalist
Martnıñ 27-nde qırımtatarlarnıñ evlerinde keçirilgen kütleviy tintüvlerden soñ ğayıp olğan qırımtatar faali Edem Yayaçikovnıñ bulunğan yeri belli degil. Bu aqta aprelniñ 2-nde rusiyeli jurnalist Anton Naumlük Facebookta bildirdi.
«Politsiya martnıñ 27-nde FSB ve politsiya hadimleri evinde (em de davanıñ diger 23 mabüsiniñ evinde tintüvler keçirilgen ve olar tutulğanda) tintüv keçirgen Edem Yayaçikovnıñ ömür arqadaşı bergen arizanen bağlı tahqiqattan evel formal areketler keçire», – dep yazdı Naumlük.
Onıñ aytqanına köre, bu, yañı «Hizb ut-Tahrir davasınıñ» Rusiye tahqiqat gruppasınıñ vekilleriniñ Yayaçikov Rusiye Federatsiyası Ceza kodeksiniñ 205.5 maddesine istinaden dava çerçivesinde tutuldı kibi resmiy olmağan malümatını inkâr ete.
«Böylece, o, ya FSB hadimleriniñ elinde resmiy olmağan şekilde buluna ve bu gizlene, ya da alâ daa tapılmadı. Nasıl olsa da, onıñ taqdiri belli degil. Maşinası Aqmescitte tapıldı, ömür arqadaşınıñ hırsızlav arizası boyunca dava açılmadı», – dep qoştı jurnalist.
Tintüv vaqtında Yayaçikov yoq edi, uquq qoruyıcılar onı qıdırdı. Martnıñ 29-nda advokat Edem Semedlâyev Rusiye uquq qoruyıcıları onı tutıp aldı, dep bildirdi. Yayaçikovnıñ apayı Rusiye politsiyasına aqayı hırsızlanğanına dair ariza berdi.
Rusiye politsiyasınıñ Yayaçikovnıñ ğayıp oluvı ve berilgen arizanen bağlı açıq izaatları şimdilik yoq.
Martnıñ 29-nda Qırımda Aqmescitteki ekinci «Hizb ut-Tahrir davası» boyunca apiske alınğan 23 qırımtatar faali Rusiyege çıqarıldı.
Martnıñ 27-nde Aqmescitniñ Kiyev rayon mahkemesi saba tutulğan doquz qırımtatar faalini apiske aldı. Martnıñ 28-nde Aqmescitniñ rayon mahkemesi martnıñ 27-nde tutulğan daa 14 qırımtatar faalini tevqif etti.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
Martnıñ 29-nda Qırımnıñ Rusiye ombudsmeni Lüdmila Lubina Qırım.Aqiqatqabildirgenine köre, Qırımda tevqif etilgen 23 qırımtatar faalini Rusiyege alıp ketkenler.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.