Aqyarlı "siyasiy sebepler" içün askerlik yapmaqtan red ete - matbuat
Aqyarda yerli sakin Rusiye ordusında hızmet etmekten vazgeçkeninde qabaatlana. "Komsomolskya pravda" bildirgeni kibi, 20 yaşındaki Gleb Şçerbakov "siyasiy sebepler" içün askerlik yapmaqtan red etti.
Matbuat, sanki Şçerbakov yazğan Rusiye ordusında hızmet etmekten vazgeçüv aktını ve arizasını derc etti.
Qırım mediası, bu adise boyunca cinayet davası (Rusiye CK-niñ 328 maddesi) açılğan edi, amma Rusiye prokuraturası onı lâğu etti, dep bildire.
Rusiye Tahqiqiy komiteti "Krıminform"ğa haber etkeni kibi, tahqiqiy idare bu qararğa itiraz köstermege niyetlene.
Rusiye Tahqiqiqy Komitetiniñ saytında bu dava aqqında haber yoq.
Daa evel Aqyar matbuatında, qarşısına cinaiy dava açılğan yigit, şeer parlamentiniñ mebusı Tatytana Şçerbakovanınıñ oğlu ola bile, dep yazğan ediler. Amma bunıñ tasdıqı yoq. Şçerbakovanıñ özü, "Komsomolskaya pravda"ğa bu vaqianı tefsir etmekten vazgeçti.
Rusiye ordusına baar çağırışı 2019 senesi iyül 15-ine qadar sürecek.
Daa evel «Qırım birdemligi» birleşmesiniñ oturışuvında Qırım adliyecisi Lilâ Gemeci, Rusiye ordusına çağırılğan Qırım gençlerini Ukraina vatandaşlığından vazgeçmege davet etkenlerini bildirdi. Onıñ aytqanına köre, vatandaşlar endi bu munasebet ile aq-uquq qorçalayıcılarına muracaat eteler.
Qırım aq-uquq qorçalayıcıları gruppasınıñ malümatına köre, üç yıl zarfında Rusiye ordusına 10 biñge yaqın Qırım sakini çağırıldı. 2018 senesiniñ yanvarinde Qırım Muhtar Cumhuriyeti prokuraturası Qırım sakinlerini, Rusiye ordusında hizmet etmek içün povestka alsalar, telefon ya da elektron poçta vastasınen muracaat etmege rica etti.