Kyiv: mahkeme Qırımnıñ sabıq Rusiye sağlıq nazirini SİZOdan ev apsine yiberdi
Bunı advokatı Valentin Rıbin rica etken edi. O, iyünniñ 25-nde Ukraina Anayasa mahkemesi devlet hainliginde qabaatlanğanlar tek eñ büyük sıñırlav tedbiri – nezaret tutuvnı – lâğu etti, dep qayd etti.
Advokatnıñ bildirgenine köre, SİZO tışında onıñ müvekkili «şaatlarğa basqı yapıp olamaz», çünki olar mahkemede endi malümat bergen ediler.
Prokurorlar Roman Muraçev ve Yevgeniy Komarovskiy Mihalçevsiyniñ SİZOdan çıqarılmasına qarşı çıqtı. Olar sabıq nazirniñ işğal etilgen Qırımda mal-mülki ve bağları bar, dep ayttılar, qabaatlav tarafınıñ fikirince, o, Rusiye ilhaq etken yarımadada saqlana bile.
Taraflarnı diñlegen Miroslava Marçenko yolbaşçılığında qadılar kollegiyası imaye muracaatını tolusınen qanaatlendirmege qarar aldı. Qararnıñ sebebi nege esaslana – belli degil, qararnıñ tek teşkiliy qısmı oquldı. Oña köre, Mihalçevskiy pasportlarını teslim etip, elektron bilezlikni taqmalı.
2018 senesi yanvarniñ 8-nden berli Petr Mihalçevskiy apiste bulunğan edi: başta Herson SİZOsından tutulğan edi, yazda onı Kyiv izolâtorına avuştırğanlar. Keçken sene iyün ayında sabıq nazirniñ davası boyunca tahqiqat yekünlengen edi.
Petr Mihalçevskiy 2014 senesi fevralniñ 27-nden iyünniñ 10-na qadar Rusiye kontrolindeki ükümette Qırım sağlıq naziri olğan edi.
Qırım Muhtar Cumhuriyeti prokuraturasınıñ fikirince, o, Ukraina Ceza kodeksiniñ 110-uncı maddesi (topraq bütünligine qast etüv) ve 111-inci maddesi (devlet hainligi) boyunca cinayet işledi.
Mihalçevskiy sağlıq naziri olıp çalışqanını tasdıqlay, amma bunı devlet hainligi dep saymay. O, QMC Yuqarı Radası onı Ukraina qanunlarına köre sayladı, dep qayd ete.