Zelenskıy Ukraina Mustaqillik Kününde arbiy paradnı keçirmemege qarar aldı
Ukraina prezidenti Volodımır Zelenskıy Ukraina Mustaqillik Kününde arbiy paradnı keçirmemege qarar aldı. Bu aqta o, video muracaatında bildirdi.
«Adet üzre avgustnıñ 24-nde, Ukraina Mustaqillik kününde, arbiy parad keçe – saltanatlı ve kesen-kes ucuz olmağan. Bu sene para yerine bu paranı Qaramanlarımızğa ayırmağa daa doğru olur. Ve biz 300 million ğrıvnâ arbiylerge bermege qarar aldıq. Bular – qısqa müddet askerleri, kursant, serjant, zabitler – er kes. Ve mıtlaqa – birleşken quvetler tedbirleri keçirilgen alandı çalışqan arbiyler», – dep ayttı devlet yolbaşçısı.
Aynı vaqıtta qayd etkenine köre, Ukraina Mustaqillik Kününiñ qayd etilüvi ve arbiylerni bayram munasebetinen qutlama merasimleri «yañı formatta» keçirilecek. Nasıl olacağı haber etilmey.
2018 senesi avgustnıñ 24-nde Kyivde arbiy para keçirilgen edi. Merasimlerde 4500 arbiy ve 250 dane arbiy tehnika iştirak etti. Kyiv sakinleri silâ çeşitlerini köre bildi.
Kyivdeki arbiy parad vaqtında 2014 senesi Qırımdan avuştırılğan Ukraina Arbiy-deñiz quvetleriniñ Mi-14 dört vertolötı uçtı. Vertolötlarnı dört yıl evelsi ant sözünden vazgeçmegen qırımlı zabitler uçurdı. Olarnıñ arasında – polkovnik İgor Bedzay.
«Odesa deñiz akademiyası» Milliy universitetiniñ Arbiy-deñiz quvetleri institutınıñ kursantlar kolonnasınıñ başında Qırımnı işğalden soñ terk etken zabit Rostislav Şarov bar edi.
1991 senesi avgustnıñ 24-nde Ukraina mustaqilligini ilân etti (o vaqıtqa qadar Ukraina Sovet Sotsialistik Cumhuriyeti olaraq Sovet Sotsialistik Cumhuriyetler Birliginiñ erkânına kire edi). 1991 senesi avgustnıñ 24-nde çıqqan Ukraina mustaqilligine dair akt 1991 senesi dekabrniñ 1-nde umumhalq rey berüvinen tasdıqlanğan edi.
1992 senesi iyün ayında bu vaqia devlet bayramı oldı, Yuqarı Rada Ukrainanıñ Mustaqillik Künü olaraq avgustnıñ 24-ni saymağa qarar berdi.