Bağçasaraydaki ekinci «Hizb ut-Tahrir davası»: imaye tarafı 50-den çoq şaatnı ketirmege planlaştıra
Bağçasaraydaki ekinci «Hizb ut-Tahrir davasınıñ» imaye tarafı Rusiye FSBsiniñ sımarışı ile ekspertiza yapqan ekspertler, dinşınas, tilşınaslar olğan 50-den çoq şaatnı ketirmege niyetlene, dep haber ete «Qırım birdemligi» cemaat birleşmesi.
İyülniñ 6-nda Rusiyeniñ Rostov-na-Donudaki Cenübiy arbiy okrugınıñ mahkemesi oturışuvında üç şaat sözge çıqtı – qırımtatar milliy areketiniñ veteranı Zevcet Kurtumerov, dava mabüslerinden biriniñ tizesi Naciye Tairova ve Ernes Ametovnıñ mektep ocası Valentina Karpinskaya.
«Qanunnen bağlı problemleri olğan insannıñ böyle hasiyetnamesini (şaatlarnıñ bugünki esnasta çıqışı aqqında aytıla – QA) kimse bir yerde bermez. Cinayetçilerge, terroristlerge hasiyetname berilmez. İnsan terrorist olsa, oña ziyalılardan bir esli-başlı insan kelip, yahşı taraftan tavsif etermi. Olmaycaq şey, cinaiy dava da öyle. Müvekkillerimiz er keske minnetdarlıq sözlerini ayttı», – dedi advokat Nazim Şeyhmambetov.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.