Ukrainanıñ Avropa Şurası temsilciligi Rusiyeden qırımtatarlarnı taqip etmesini toqtatmasını talap etti
«Bu Rusiye mahkeme sistemasınıñ adaletnen iç bir alâqası olmağanını köstere, qırımtatarlarğa qarşı taqip siyaseti devam ete ve işğal etilgen Qırımda farqlı fikir alâmetlerini bastırıla. Bu ajderha üküminiñ ilân etilmesine mabüslerge qol tutmaq içün ketken tahminen 120 qırımtatarınıñ aman-aman 9 saat Keriç köpründe sıcaq içeceksiz ve aşsız sıfır derecede tutuluvı açuvlandıra», – dep qayd etti Tarasük.
Ukrainanıñ daimiy vekili Rusiyeden mahkeme qararını lâğu etmesini ve Rusiyede qanunsız tutulğan bütün Ukraina vatandaşlarını acele azat etmesini talap etti.
«Ukraina Avropa Şurası Baş kâtibini, Avropa Şurası insan aqları Komissarını ve Avropa Şurası aza devletlerini bu qanunsız areketlerge cevap berip, Rusiye Federatsiyasından halqara uquq normalarınıñ bozuluvını, hususan vaqtınca işğal etilgen Ukraina topraqlarında gumanitar ve halqara uquq normalarınıñ bozuluvını toqtatmasını talap etmege çağıra», – dep aytıla haberde.
Hatırlatamız, Avropa Birligi Rusiyeni Qarasuvbazardaki «Hizb ut-Tahrir davası» mabüslerini ve diger tutulğan ukrainalılarnı azat etmesine çağırdı. Bundan evel ABD elçihanesi yanvarniñ 12-nde Rusiyedeki mahkeme tarafından qırımtatarlarğa çıqarılğan ükümni takbih etti. Avropa elçileri de Qarasuvbazardaki «Hizb ut-Tahrir davası» mabüsleriniñ ükmüni takbih etti.
Yanvarniñ 12-nde Rusiye mahkemesi Qarasuvbazardaki «Hizb ut-Tahrir davası» mabüslerini sert rejim koloniyasında qalmalarına üküm etti. Enver Ömerov 18 yılğa, Ayder Cepparov 17 yılğa, Riza Ömerov 13 yılğa üküm etildi. Mahkümler qabaatlarını tanımay.
Ukraina ombudsmeni Lüdmila Denisova qırımlılarğa çıqarılğan ükümni takbih etti, Ukraina Tış işler nazirligi ise Rusiyeden mahkeme qararını lâğu etmesini ve qırımtatarlarnı azat etmesini talap etti. Rusiye tarafı Ukraina nazirliginiñ beyanatına daa cevap bermedi. Qırım Muhtar Cumhuriyeti ve Aqyar prokuraturası Rusiye mahkemesiniñ ükmüni «daa bir repressiya dalğası» dep adlandırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.