Ukraina ombudsmanı Qırımda Meclis reisi Çubarovğa çıqarılğan ükümni takbih etti
«Lafta «Qırım Yuqarı mahkemesiniñ» qararını tanımayım! Qayd eteyim: bu mahkeme başlağanından berli Refat Çubarov adaletli mahkeme, adliye ve semereli uquqiy yardım aqqından marum etildi, bu da Avropa insan aqları şartnamesiniñ 6, 13 maddelerini boza», – dep qayd etti Denisova Facebook saifesinde.
Onıñ aytqanına köre, bu üküm «işğalci memleketniñ taqip siyasetini ve Ukraina vatandaşlarına qarşı repressiyalarnı devam ettirgeniniñ delili ola».
«Halqara toplulıqnı buña cevap bermege ve istilâcığa qarşı basqını quvetleştirmege çağıram, halqara uquq normaları yerine ketirilsin ve Rusiyede ve vaqtınca işğal etilgen Qırım, Donetsk ve Lugansk vilâyetlerinde qanunsız tutulğan er kes acele azat etilsin», – dep yazdı Lüdmila Denisova.
Avropa Birliginiñ Ukraina elçisi Matti Maasikas Qırımtatar Milliy Meclisiniñ reisi Refat Çubarovğa qarşı çıqarılğan qararnı «mısqıl» dep adlandırdı.
Qırımtatar Milliy Meclisiniñ reisi Refat Çubarov Qırım.Aqiqat Radiosınıñ yayınında Rusiye kontrolindeki Qırım Yuqarı mahkemesiniñ ğıyabiy ükmüni «uquq ceetinden faydasız» dep adlandırdı.
Üküm çıqarılğan soñ Qırımtatar Milliy Meclisiniñ tayinlengen advokatı Aleksandr Osokin da ğıyabiy ükümni şikâyet etecek, dep bildirdi. Ukraina Tış işler naziriniñ birinci muavini Emine Ceppar işğal etilgen Qırımda Qırımtatar Milliy Meclisiniñ reisi Refat Çubarovğa qarşı esnasnı ve çıqarılğan ğıyabiy ükümni «ayıp mahkeme» dep adlandırdı.
Qırım Muhtar Cumhuriyeti ve Aqyar prokuraturası Çubarovğa qarşı mahkeme ükmüni «qanun ve cenk adetleriniñ bozuluvı» olaraq tasnif etti.
Çubarov Qırım.Aqiqat Radiosınıñ yayınında Aqmescitte çıqarılğan mahkeme ükmüni «uquq ceetinden boş» dep adlandırdı. O, Avropa insan aqları mahkemesine muracaat etmege niyetlene, dep bildirdi.
Mayısnıñ 24-nde olıp keçken oturışuvda qabaatlav Çubarov içün 9 yıl apis cezası berilmesini istedi. Meclis reisi qabaatlav tarafınıñ talabını izaatlap, Qırımdaki «mahkeme» onıñ ayatına tesir etmeycek, dep ayttı.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
Bıltır iyül ayında Aqmescitteki mahkeme Çubarovğa qarşı cinaiy davanı temelden baqıp başladı. Tayin etilgen advokat Aleksandr Osokin Qırımtatar Milliy Meclisiniñ reisine qarşı mahkemeni şikâyet etti.
Çubarovnıñ qayd etkenine köre, Rusiye akimiyeti «qırımtatar halqına qarşı yañı repressiya dalğasını başlattı».
Ukraina Yuqarı Radasınıñ İnsan aqları vekâletlisi Lüdmila Denisova bu davanı qanunsız dep adlandırdı.
Qırım Muhtar Cumhuriyeti ve Aqyar prokuraturası Rusiye tahqiqatçılarınıñ Çubarovğa qarşı açqan cinaiy dava sebebinden tahqiqat başlatqan edi.