Rusiyede mahküm etilgen qırımlı Teymur Abdullayevniñ ceza izolâtorında qaluv müddeti uzatıldı
Abdullayevniñ apayına «Zonatelekom» vastasınen bildirgenine köre, artıq sıq-sıq «qaba» tintüvler keçirile.
«Teymur, memuriyet onı kamera türlü yerge avuştırılmasına azırlay, dep tarif etti. Bu koloniya çerçivesinde olğan ve onıñ terkibiy birlemi olğan apishane kamerası kibi bir yer. Mabüsler (yarım yılğa qadar) ceza belgilengen müddet devamında yaşağan mahsus qapalı yer», – dep aytıla haberde.
«Qırım birdemligi» Abdullayev yüksek qan basımınen çekişe ve ceza izolâtorında qalğanda vaziyet daa beter ola, dep hatırlattı.
Oktâbrniñ soñunda berilgen malümatqa köre, Teymur Abdullayevniñ Rusiye koloniyasındaki ceza izolâtorında qaluv müddeti daa 12 künge uzatıldı.
Teymur Abdullayev bir yıldan ziyade Rusiyeniñ Salavat şeerindeki koloniyanıñ ceza izolâtorlarında tutuldı. Ceza izolâtorınıñ müdriyetiniñ versiyasına köre, o, tutuv rejimini muntazam tarzda bozğan. İyünniñ başında, advokatları ve tuvğanlarınıñ ğayreti sayesinde onı ŞİZO-dan çıqardılar.
Dilâra Abdullayeva iyülniñ 28-nde Kyivde Ukraina prezidentiniñ ofisi ögünde bir kişilik narazılıq aktsiyasını ötkerdi. O, başlıqlardan oğullarınıñ – Ukraina vatandaşlarınıñ azat etilmesi meselesinden ne iş körgenleri aqqında malümat bermege talap etti.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.