Путин Конституциягә Президент срогына бәйле үзгәреш кертү мөмкинлеге турында белдерде
(Казан, 19 декабрь, «Татар-информ», Надежда Гордеева). Дәүләт башлыгы Владимир Путин РФ Конституциясенә Президент срокларына кагылышлы үзгәрешләр кертү мөмкинлеге турында белдерде. РФ Президенты бүген зур матбугат конференциясе барышында шул хакта хәбәр итте.
«Бу уңайдан нәрсә эшләргә мөмкин? Менә мин ике срок президент вазифасында булдым, аннары бу вазифадан киттем һәм конституцион хокуктан файдаланып, Президент вазифасына кире кайттым, чөнки бу рәттән ике срок түгел иде», - дип искәртте Путин.
РФ Президенты билгеләп үткәнчә, Конституция җәмгыятьнең үсеш дәрәҗәсенә тәңгәл килергә тиеш. Әмма, аның фикеренчә, яңа Конституция кабул итәргә кирәкми. «Ни өчен дигәндә, бездә Конституция белән беркетелгән фундаменталь әйберләр бар һәм аларны тулысынча гамәлгә ашырырга кирәк. Бу беренче бүлеккә кагыла. Минем фикеремчә, әлеге бүлек кагылгысыз булып тора. Калганнарын теге яки бу дәрәҗәдә үзгәртергә мөмкин», - дип өстәде ул.
«Әлбәттә, мин әлеге уңайдан алып барыла торган дискуссияләрне беләм, алар хакында ишеткәнем бар. Шушы әйберләрне тәкъдим итүчеләрнең логикасын аңлыйм. Бу парламентның хокукларын киңәйтү, Президент һәм Хөкүмәтнең аерым хокукларына кайбер үзгәрешләр кертү белән бәйле. Әмма боларның барысын да яхшылап әзерләнгәч һәм җәмгыятьтә фикер алышулар үткәргәннән соң гына эшләргә мөмкин», - дип сүзен йомгаклады Путин.
Мәскәүдә Владимир Путинның 15нче матбугат конференциясе уза. Быел чарада 1895 журналист катнашырга теләк белдерде. Бу – рекордлы күрсәткеч.