Миңнеханов торак тапшыру күләмен арттыру өчен барлык резервларны кулланырга өндәде
(Казан, 1 февраль, «Татар-информ»). Татарстан Президенты Рөстәм Миңнеханов бүген ТР Хөкүмәт Йортында узган традицион республика киңәшмәсендә торак тапшыру күләмен арттыру өчен барлык резервларны эшкә җигәргә өндәде. Бу хакта республика җитәкчесенең матбугат хезмәте хәбәр итә.
Рөстәм Миңнеханов Татарстанның барлык муниципалитетлары белән видеоконференцэлемтә режимында киңәшмә үткәрде. Чарада шулай ук ТР Премьер-министры вазифаларын башкаручы Рөстәм Нигъмәтуллин катнашты.
31 гыйнварга булган мәгълүматлар буенча, Татарстанда 207,2 мең кв. метр торак тапшырылган, бу 2020 елга планлаштырылганның 7 процентын тәшкил итә, дип сөйләде Татарстан төзелеш, архитектура һәм торак-коммуналь хуҗалык министры Фәрит Хәнифов.
Аерым алганда, докладчы сүзләренчә, социаль ипотека программасы буенча планлаштырылган гомуми мәйданы 273,6 мең кв. метр булган 4 970 фатирлы 130 йортның 5,2 мең кв. метр мәйданлы 108 фатирлы ун йорт тапшырылган. Тагын 12 бина югары әзерлек дәрәҗәсендә. Шул ук вакытта 61 йорт уртача әзерлек дәрәҗәсендә, ә 47 объектта аз эш башкарылган.
Күпфатирлы инвестицион торак программасы буенча 1 млн 317,2 мең кв. метр мәйданлы 177 торак йортның 22се файдалануга тапшырылган. 69 объект югары, 63 объект уртача, ә 23 объект түбән дәрәҗәдә әзер, диде Фәрит Хәнифов.
Шул ук вакытта 1 млн 388,2 мең кв. метр мәйданлы 10 680 шәхси йортның 70,2 мең кв. метр мәйданлы 540 йорт файдалануга тапшырылган.
Моннан тыш, агымдагы елда гомуми мәйданы 4,5 млн кв. метр булган 788 күпфатирлы йортка ремонт ясау күздә тотыла. Программа, Әлки, Әтнә, Чүпрәле һәм Кайбыч районнарыннан тыш, Татарстанның барлык муниципаль берәмлекләрендә гамәлгә ашырыла.
Рөстәм Миңнеханов РФ Президенты Владимир Путин куйган торакны файдалануга тапшыру күләмнәрен арттыру бурычын хәл итү өчен барлык резервларны да кулланырга кирәклегенә игътибарны юнәлтте. Беренче чиратта, аның фикеренчә, комплекслы төзелешне үстерергә кирәк. Юллар һәм инфраструктура объектлары төзелеше белән бәйле сорауларны алдан ук хәл итәргә кирәк, диде ул.
«Шулай ук индивидуаль торак төзелеше өлешендә потенциал зур, монда күләмнәрне ничек арттырырга икәнен карарга кирәк», — диде ТР Президенты. Шулай ук ул тиешле рәвештә теркәлмәгән шәхси йортлар хуҗаларына кирәкле документларны рәсмиләштерү белән ярдәм итәргә тәкъдим итте. Фәрит Хәнифов аңлатуынча, Татарстанда бу мәсьәләләр буенча ведомствоара эшче төркем булдыру планлаштырыла