Хезмәт министрлыгы эштән азат итү кагыйдәләрен үзгәртү турындагы хәбәрне кире какты
(Казан, 1 февраль, «Татар-информ»). РФ Хезмәт һәм социаль яклау министрлыгы массакүләм мәгълүмат чараларының 1 февральдән Россиядә эштән азат итү кагыйдәләренең үзгәрүе турындагы хәбәрен кире какты. Бу турыда РИА Новости хәбәр итә.
Ведомство матбугат хезмәтендә хәзер вазифадан киткәндә хезмәткәргә СТД-Р формасы буенча хезмәт эшчәнлеге турында документ бирергә тиеш дигән хәбәргә үз җабавын бирде.
Хезмәт һәм социаль яклау министрлыгында аңлатуларынча, СТД-Р формасы буенча мәгълүмат эш бирүче тарафыннан хезмәт кенәгәсенең электрон форматын сайлаган хезмәткәргә эштән чыгарганда гына түгел, аларның соравы буенча бирелә. СТД-Р формасы турындагы боерык әле Юстиция министрлыгында дәүләт теркәвендә тора, диделәр матбугат хезмәтендә.
Электрон хезмәт кенәгәсе турындагы закон 1 гыйнвардан үз көченә керде. Хәзер хезмәткәрләр эшчәнлеге турындагы белешмәне кәгазьдә яки электрон формада сорарга мөмкин.
1 июльгә кадәр барлык эш бирүчеләр бу үзгәрешләр турында эшчеләргә хәбәр итәргә тиеш, ә алар хезмәт кенәгәсенең уңайлы форматын сайлый ала. 31 декабрьгә кадәр гариза бирергә мөмкиин. Әгәр дә хезмәткәр гариза язмаса, эш бирүче аның хезмәт эшчәнлеген кәгазьдә алып баруны дәвам итәчәк.
2021 елның 1 гыйнварыннан эшкә беренче тапкыр керүчеләрнең хезмәт кенәгәләре бары тик электрон рәвештә генә рәсмиләштереләчәк.