Кукмара районында язгы чәчүгә югары уңыш бирүче элиталы орлык әзерлиләр
(Кукмара, 1 февраль, «Татар-информ», «Хезмәт даны»). Кукмара районында чәчүлек орлыкның 55 проценты оригиналь һәм элита репродукцияле. Бу хакта район басмасы Кукмара районының баш агрономы Илдар Габбасов сүзләренә сылтама белән хәбәр итә.
«Кукмара районында чәчүлек материал хәзерләү эшләре бара. Хәзерге вакытта планга карата 123 процент күләмендә орлык тупланган. Әлеге орлыкларның 55 проценты оригиналь һәм элита репродукцияле», — ди баш агроном.
Моннан тыш, тагын 10 тонна оригиналь орлык сатып алынган. Районда орлыкчылык белән шөгыльләнүче дүрт хуҗалык исәпләнә. Аларда сатуга дигән 1000 тоннадан артык чәчүлек материал бар.