Татарстан Министрлар Кабинетында республика мәдәниятен үстерү турында фикер алыштылар
(Казан, 10 август, «Татар-информ»). Бүген Татарстан Министрлар Кабинетында 2020-2025 елларга һәм 2030 елга кадәрге чорга республиканың мәдәният үсеше стратегиясе турында фикер алыштылар. Бу хакта ТР Президенты матбугат хезмәте хәбәр итә. Эшлекле киңәшмәне Татарстан Премьер-министры Алексей Песошин ачты. Ул хәбәр иткәнчә, стратегия ике максатка ирешергә тиеш. Бер яктан, тармакны үстерү «мәдәни традицияләрне, матди һәм матди булмаган мәдәни мирасны саклап калуны» күздә тота. Шул ук вакытта яңа креатив практикалар, заманча карарлар турында да онытырга ярамый. Бу бурычларның һәрберсе Татарстанның уңышлы социаль-икътисади үсешенең аерылгысыз шарты булып тора, дип билгеләп үтте Песошин. Киңәшмәдә төп доклад белән ТР мәдәният министры Ирада Әюпова чыгыш ясады. Аның сүзләренә караганда, мәдәният республиканың гармонияле үсешенә юнәлдерелгән булырга тиеш, чөнки ул хәзер бөтендөнья татар мәдәнияте үзәге булып тора. Татарстан мәдәниятен үстерү стратегиясенең төп бурычы — мәдәни байлыкларның һәркем өчен мөмкин булуын тәэмин итү, аны тарату һәм цифрлаштыру. Цифрлаштыру турында сөйләгәндә, Татарстан мәдәният министры коронавирус пандемиясе чоры бу мәсьәләнең мөһимлеген күрсәтте, дип билгеләп үтте. Утырышка йомгак ясап, Татарстан Республикасы Премьер-министры Алексей Песошин тармакта башкарылган зур эшләрне билгеләп үтте, шулай ук республика Мәдәният министрлыгына стратегия нигезләмәләрен эшләп бетерергә кушты. Яңартылган проект Татарстан Республикасы Министрлар Кабинетына раслауга җибәреләчәк.