Актанышта велосипедчылар өчен махсус клуб ачылачак
(Актаныш, 27 август, «Татар-информ», «Актаныш таңнары» ). Шушы көннәрдә Яшьләр эшләре, спорт һәм туризм бүлеге җитәкчесе Айдар Иманаев инициативасы белән Актанышта велосипедчылар клубы төзеләчәк. 26 август көнне иҗтимагый оешманың тәүге утырышы булып, чарада велоклуб җитәкчесе сайланды. Бу турыда район басмасы хәбәр итә.
Әлеге вазифаны эшмәкәр, спорт товарлары белән сәүдә итү ноктасы җитәкчесе, райондагы төрле хәйрия акцияләрендә балаларны сөендерүче Илназ Мәрдәнов башкарачак.
«Аеруча яшьләр арасында велосипед спортына кызыксыну арта районда. Әле бездә бу спорт төре үз башлангычын ала гына. Киләчәктә шушы иҗтимагый оешма тарафдарлары белән берлектә район велосипедчыларын бергә туплап, тагын да киңрәк масштабларда чаралар үткәрергә дигән максатыбыз бар. Бүген Актанышта рәсми велосипед юллары юк, урамнарда иркенләп велосипедта йөрерлек шартлар да җитәрлек түгел. Велоклубка теркәлүчеләр белән шушы мәсьәләләрне хәл итүдә проектлар ясау идеяләрен карыйбыз», — диде Айдар Иманаев.
Әлегә велосипед клубы әгъзаләре атнага бер җыелачак. Очрашуларда оештыру моментлары өйрәнелә. Велоклубта теркәлүчеләргә спорт объектларында, түгәрәкләрдә шөгыльләнүгә ташламалар булыр дип көтелә. Моның өчен һәр велосипедчыга клуб картасы булдырылачак.