Владимир Путин КАМАЗ топ-менеджерын батырлыгы өчен бүләкләде
(Чаллы, 8 декабрь, «Татар-информ»). Россия Президенты Владимир Путин «КАМАЗ» ГАҖ департаменты директоры Андрей Пивневны кешене үлемнән коткарып калган өчен медаль белән бүләкләде. Тиешле указ РФ хокукый мәгълүматының рәсми интернет-порталында басылып чыкты.
Документта билгеләп үтелгәнчә, Пивнев «экстремаль шартларда кешеләрне коткарганда күрсәткән батырлык, кыюлык һәм тәвәккәллек өчен» бүләккә лаек булган.
Андрей Пивнев 2018 елның 27 декабрендә Мәскәү метросында батырлык гамәле кыла. Ир-ат хатын-кызның аңын югалтуын һәм рельсларга егылып төшүен күреп ала. Ул аның артыннан сикереп төшә һәм аны күтәрә, бу вакытта аның үзенең аягы сына.
Кыюлыгы өчен Андрей Пивнев элек Мәскәү мэры урынбасары Максим Ликсутовның Рәхмәт хатын алган була.