Иртәгә Татарстанда 36 градуска кадәр салкынайтачак
![Иртәгә Татарстанда 36 градуска кадәр салкынайтачак](https://tatar-inform.tatar/attachments/3eaece33c1d2c11e2952d4c42b9907be37a15bbd/store/fill/780/440/c7ae2621ec4f4560c3a88a6213fd1e44acc9303e3eb37f223f3375fe75ad/9ed36bb1-b94b-4762-ad2e-9bc4bd3b0c4b.jpg)
(Казан, 8 февраль, «Татар-информ»). Иртәгә, 9 февральдә, Татарстанда тагын да салкынайтачак. Татарстан Гидрометеорология һәм әйләнә-тирә мохитне күзәтү үзәге хәбәр иткәнчә, аз болытлы һава торышы һәм төнлә салкынайту аркасында температура тагын да төшәчәк. Республика территориясендә антициклон хакимлек итүен дәвам итәчәк, диде метеорологлар. Төбәктә явым-төшем көтелми. Җил көнбатыштан һәм көньяк-көнбатыштан уртача тизлектә исәчәк. Юлларда бозлавык сакланачак. Синоптиклар мәгълүматлары буенча, төнлә һава температурасы -24…-29 градус, аязганда — 36 градуска кадәр төшәргә мөмкин. Көндез һава температурасы -18…-23 градус булачак.