Рөстәм Миңнеханов Алабугада болан үрчетү хуҗалыгын карады
(Казан, 31 май, «Татар-информ»). Бүген Татарстан Президенты Рөстәм Миңнеханов Алабуга районында болан үрчетә торган «Вятский берег» хуҗалыгында булды. Татарстан Президентының матбугат хезмәте хәбәр иткәнчә, Рөстәм Миңнеханов хайваннарны асрау шартлары һәм туристлар җәлеп итү планнары белән танышты. Болан асрау буенча проект 2020 елда башланды. Биредә вольерлар төзелгән, азык әзерләнгән. Хәзер барлыгы 479 баш болан бар. Киләсе елга кадәр баш санын меңгә җиткерергә җыеналар.
Президентка вольерларны, аларны асрау системасын күрсәттеләр. Бу системага сортировка, үлчәү, вакцинация һ.б. керә. Яңа алынган боланнарны бер айга карантинга ябалар. Хәзер хайваннар җәйге вольерда яши. Кышын аларны фермага күчерәләр. Комплекс директоры Гөлнира Пестерникова сүзләренчә, якын киләчәктә хуҗалык базасында туристлык кластерын үстерергә җыеналар. «Табигый парк ясарга телибез. Кешеләр гаиләләре белән ял итәргә килеп, табигый тирәлектә хайваннарны күзәтә алачак», — ди ул. Аның сүзләренчә, киләчәктә боланнарга чип куярга җыеналар. Электрон биркада хайван турында белешмә — аның яше, авырлыгы, прививкалар турында мәгълүмат булачак.