Июньдә сәүдә үзәкләре, кафе-рестораннар Covid-кагыйдәләрне 6 процентка күбрәк бозган
(Казан, 3 июль, «Татар-информ»). Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе белгечләре июнь аенда 1,5 мең объектны (сәүдә үзәкләре, массакүләм чаралар, кафе һәм рестораннар) тикшергән.
Шул ук вакытта, аларның 17 процентында коронавируска каршы чараларны бозу очраклары ачыкланган. Бу май ае белән чагыштырганда 6 процентка күбрәк. Роспотребнадзорның ТР буенча идарәсе башлыгы урынбасары Любовь Авдонина видеоконференция элемтәсе режимындагы киңәшмәдә шулай дип белдерде.
Сәүдә үзәкләре администрациясе күбесенчә битлек режимы үтәлешен контрольдә тоту турындагы пунктны бозган. Моннан тыш, Казанның «Тандем» сәүдә үзәгендә белгечләр дезинфекция режимының бозылуын ачыклаган, Түбән Камадагы «Березка» сәүдә үзәгендә исә сатып алучылар гына түгел, хезмәткәрләр үзләре дә битлексез йөри, дезинфекция үткәрелми һәм антисептиклар юк икән.
Җәмәгать туклануы объектлары арасында закон бозучылар 17 процент тәшкил иткән: аларда шулай ук битлек режимы үтәлмәгән, бактерицид нурландыргычлар кулланылмаган һәм хезмәткәрләр арасында термометрия үткәрелмәгән.
Авдонина китергән мәгълүматлар буенча, 2021 ел башыннан алып 29 җәмәгать туклануы предприятиесе, шулай ук җиде кибетнең эшчәнлеге туктатылган, алар арасында икешәр бина июнь аенда вакытлыча ябылган.
Шулай ук 37 җәмәгать туклануы предприятиесе вакыт ягыннан чикләмичә эшләүне сорап гариза биргән. Аларның 21е буенча уңай карар кабул ителде, диде Роспотребнадзорның ТР буенча идарәсе башлыгы урынбасары.
«Хәзерге вакытта чыгарылыш кичәләре, туйлар чоры булса да һәм банкетлар төн уртасына кадәр сузылуга карамастан, кафе һәм рестораннардан гаризалар килмәде», — дип өстәде ул.