Марат Хөснуллин төбәкләрне илкүләм юл проектлары буенча эшне тизләтергә чакырды
(Казан, 11 ноябрь, «Татар-информ»). 2021 елның 10 аенда Россиянең 20 төбәге илкүләм юл проектлары буенча планлаштырылган эшләрне төгәлләгән. Бу хакта төбәк үсеше буенча Хөкүмәт комиссиясе президиумы утырышында вице-премьер Марат Хөснуллин сөйләде.
Ул шулай ук эшләр дәвам иткән субъект җитәкчеләренә мөрәҗәгать итте.
«Вакыт аз калды, төбәкләр өчен урыннардагы бурыч — 2021 елда юл эшчәнлегенә бюджет тарафыннан бүлеп бирелгән акчаларны тулысынча, 100 процентлы үзләштерү»,-дип искәртте Россия Премьер-министры урынбасары.
Шулай ук ул юл объектларында куркынычсызлыкны тәэмин итүгә игътибар итте һәм төбәк башлыкларын авария хәлендәге участокларда ремонт эшләрен аерым контрольдә тотарга чакырды.
Йомгак ясап, Хөснуллин алдагы өч елда юл төзелеше өлкәсендә нинди эшләр көтелүен сөйләде. Бу, барыннан да элек, шәһәр юлларының 85 проценты һәм төбәк трассаларының 50 проценты торышын яхшырту, шулай ук төбәкләрнең М12 Мәскәү-Казан трассасын төзү кебек эре проектларда катнашуы. Моннан тыш, илдә эре проектларны алдан финанслау программасы булдырылачак.
Илкүләм проектлар илдә 2019 елдан башлап Россия Президенты Владимир Путинның май указлары буенча тормышка ашырыла.