Попова: Коронавирус кичергән кешеләр грипп йоктыру куркынычы янаган яңа төркемгә керә
(Казан, 18 ноябрь, «Татар-информ»). Коронавирус инфекциясен кичергән барлык кешеләргә дә гриппка каршы прививка ясарга кирәк, чөнки алар әлеге авыруны йоктыру куркынычы янаган яңа төркемгә керә.
Россия Кулланучы хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) башлыгы Анна Попова Дәүләт Думасының Сәламәтлек саклау комитеты утырышында шулай дип белдерде. Бу хакта РИА Новости агентлыгы хәбәр итә.
«Әлегә вакыт бар, безгә күпмесенә өлгерсәк, шуның кадәр кешегә гриппка каршы прививка ясарга кирәк. Моны хәзер үк эшләү зарур. Ковид белән авырган барлык кешеләр дә вакцинация узарга тиеш», - дип искәртте илнең баш санитар табибы.
Шул ук вакытта Попова искәрткәнчә, моңарчы эндокрин патологиясе, үпкә һәм йөрәк авыруларыннан интегүчеләр, өлкән яшьтәгеләр һәм көмәнле хатыннар гына куркыныч янаган төркемгә керә дип санала иде. Хәзер аларга коронавирус кичергән кешеләр дә өстәлде.
Россиядә вакцинация кампаниясе дәвам итә. РФ Президенты Владимир Путин вакцинациянең әһәмиятен, коронавируска каршы Россиядә уйлап табылган препаратларның нәтиҗәле һәм куркынычсыз булуын күп тапкырлар искәртте. Бүген ул тестлаштыру темпларын арттыруны таләп итте.