Тинчурин театрында «Балачак дөньясы» ноталар җыентыгы тәкъдим ителде
(Казан, 18 декабрь, «Татар-информ, Рузилә Мөхәммәтова). Тинчурин театрының Ильяс Камал җитәкләгән данлыклы оркестры бүген театрга килгән балалар өчен уйнады. Театр фойесында куелган чыршы янында «Балачак дөньясы» исемле ноталар җыентыгы тәкъдим ителде. «Җәвад Тәрҗемановның туганнары безгә шундый китап бастыру идеясе белән чыктылар. Китапның аудиториясе — балалар бакчасы һәм башлангыч класс балалары. Җәвад Тәрҗемновның җырлары безгә таныш, без әлеге җырлар яңа версиядә дә җырлансын иде дип өметләнәбез», — диде әлеге китапны бастырган «Юлбасма» нәшрияты җитәкчесе Гүзәл Хәсәнова «Татар-информ» хәбәрчесенә. Җыентык күренекле татар шагыйре Җәвад Тәрҗемановның тууына 100 еллыгы уңаеннан бастырылган. Җырларның авторы — Алсу Сөнгатуллина. Җырларны Казан дәүләт консерваториясе студенты, республика конкурслары лауреаты Диләрә Нәбиуллина башкарды. Фортепианода композитор үзе иде. Концерт алдыннан кичәне алып баручы Эльза Нәбиуллина балаларга мондый чаралар вакытында үзеңне ничек тотарга икәнлеген өйрәтте. Кунаклар белән дә таныштырды. «Бу мәдәният дөньясында зур вакыйга. Балалар өчен китаплар байтак чыкса да, андый җыентыклар юк дәрәҗәсендә. Мондый җыентыклар күбрәк булсын иде», — диде кунакларның берсе — ТР Мәдәният министрлыгының бүлек мөдире Айрат Фәйзрахманов. «Гүзәл Хәсәновага зур рәхмәт — аның күп еллар ноталар бастырасы килә. Былтыр „Алтын Казан“ мюзиклының кайбер җырлары ноталар белән басылган иде, быел — шушы китап. Киләсе концертларда балалар җырларын балалар үзләре җырласа тагын да зур уңыш булыр иде», — диде Эльмир Низамов. Үзе дә алга таба балалар җырлары юнәлешендә активрак эшләргә вәгъдә бирде. «Әлеге кичә биредәге балаларның күңеленә сеңеп калачак. Алар татар көен онытмаячак. Милләтне милләт иткән әйбер — тел. Телнең кадерен югалтып барабыз. Күп кенә татар язучыларының балалары татарча белми. Миндә дә бар ул проблема. Биредә утырган әби-бабайларга, ата-аналарга башымны иям — рәхмәт сезгә бирегә килгәнегез өчен», диде ТР Язучылар берлеге рәисе урынбасары, шагыйрь Рифат Җамал.
«Балачак дөньясы» исемле ноталар җыентыгы тиражы 800 данә белән чыккан. Китап Казандагы барлык китап кибетләрендә һәм онлайн маркетларда сатыла.
Җыентыкны тәкъдир итү — Тинчурин театрының һәм шәһәр мәдәни институтларының беренче уртак проекты. Тинчурин театры үз миссиясен, киң даирә кулланучылар өчен мирас булдырып, җирле авторларга, башкаручыларга, нәширләргә ярдәм итүдә күрә.