Миңнеханов Татарстаннан VIII чакырылыш Дәүләт Думасы депутатлары белән очрашу уздырды
(Казан, 29 декабрь, «Татар-информ»). ТР Министрлар Кабинетында Татарстан Президенты Рөстәм Миңнехановның республикадан сайланган Дәүләт Думасы депутатлары белән беренче очрашуы узды. Фикер алышуның төп темалары федераль максатчан программаларда катнашу һәм федераль дәрәҗәдә закон чыгару инициативаларын алга этәрү булды, дип хәбәр итә республика җитәкчесенең матбугат хезмәте.
Чарада шулай ук ТР Дәүләт Советы Рәисе Фәрит Мөхәммәтшин, республика министрлыклары һәм ведомстволары вәкилләре, ә видеоконференция элемтә режимында — муниципаль берәмлекләр катнашты.
Яңа чакырылыш Дәүләт Думасына Татарстаннан 15 депутат керде, аларның 10сы беренче тапкыр сайланды.
«Быел безнең республиканың Дәүләт Думасындагы вәкиллеге шактый яңарды. Мондый составта без зур нәтиҗәләргә ирешә алырбыз дип ышанам. Өч депутатыбыз Дәүләт Думасы комитетларын җитәкли, икесе — комитет рәисләре урынбасарлары, калганнары — профильле комитетлар әгъзалары», — диде Татарстан Президенты.
Шулай ук Рөстәм Миңнеханов Татарстанда 2021 ел нәтиҗәләре турында сөйләде. Тулаем төбәк продукты 3,2 трлн сум тәшкил итте, сәнәгать җитештерүе индексы 108,3 процент дәрәҗәсендә, озатылган продукция күләме — 3,8 млрд сум.
Ул мондый саннар пандемия һәм икътисади кризис зыян китергән икътисадның җанлануы турында сөйли, диде. Шуңа да карамастан, ирешелгәннәрдә тынычланырга ярамый, югары нәтиҗәләргә ирешергә һәм уңай динамиканы саклап калырга кирәк. «Барлык предприятиеләр дә тулысынча торгызылмаган. Аларга ярдәм итү эшен дәвам итәргә кирәк. Моннан тыш, кече һәм урта бизнес та игътибар таләп итә», — дип саный ТР Президенты.
Шулай ук чара барышында сайлаучылар наказларын үтәү буенча үткәрелә торган эш темасы да күтәрелде. Сайлау кампаниясе вакытында 5,4 меңнән артык наказ алынган, аларның бер өлеше республика программаларын формалаштырганда хәл ителгән, икенчеләре Россия Президенты Владимир Путин указы буенча илдә тормышка ашырыла торган федераль программаларга һәм милли проектларга керәчәк, дип искәртте Рөстәм Миңнеханов.
«Татарстан икътисадына федераль акчалар җәлеп итү буенча эшче төркемнәр эшчәнлеге сайлаучылар наказларын үтәүгә юнәлдерелергә тиеш», — диде Президент.
ТР Дәүләт Советы Рәисе Фәрит Мөхәммәтшин, үз чиратында, республика мәнфәгатьләрен алга этәрү буенча закон чыгару эшчәнлеген алып бару, закон чыгару инициативаларын алып бару һәм беркетелгән сайлау округларында эш алып баруны өстенлекле бурычлар буларак билгеләп үтте. Ул искәрткәнчә, алдагы наказлар буенча төзелгән «юл картасы» 90 процентка диярлек үтәлгән.
«Хәзерге вакытта бик күп федераль программалар гамәлгә ашырыла, аларда төбәкләр дә актив катнаша ала. Безгә бу мөмкинлектән файдаланырга кирәк», — диде ул.
Татарстан Президенты куйган бурычларны үтәү өчен VIII чакырылыш Дәүләт Думасында профильле юнәлешләр буенча 17 эш төркеме төзелде. Анда Татарстаннан депутатлар да, федераль парламентарийлар да катнаша. Россия парламентының түбән палатасында Татарстан депутатларының координаторы итеп Дәүләт Думасы депутаты Айрат Фәррахов билгеләнде.