Татарстанда әфганчылар ала торган ярдәм күләме билгеле булды
(Казан, 19 февраль, «Татар-информ») I яки II төркем инвалидлык билгеләнгән әфганчылар 6 меңнән 9 мең сумга кадәр пенсия ала.
Сугыш хәрәкәтләрендә катнашучыларның кайберләренә инвалидлык статусы соңрак бирелә. Әгәр дә бу вакыйгаларны бергә бәйләп булмый икән, түләүләр азрак күләмдә була. Бу хакта «Татарстан-24» каналында Андрей Кузьминга биргән интервьюсында Әфган ветераннары берлегенең Татарстан оешмасы рәисе Евгений Кабыш сөйләде.
Түләүләрне дәүләт һәм җәмәгатьчелек тарафыннан тәкъдим ителгән бушлай юлламалардан һәм медицина хезмәтләреннән баш тартып алырга мөмкин.
«Сумма зур түгел, әлбәттә, күбрәк булуын теләр идек. Хәзер хәрбиләрнең пенсияләрен 8 процентка индексацияләделәр, ләкин инфляция барыбер югарырак. Әгәр бу кеше I, II төркем инвалид булса, пенсия күләме 6 меңнән алып 9 мең сумга кадәр тәшкил итә. Әмма сугыштан соң инвалид булган ветераннар да бар, ләкин моны үзара бәйләү әлегә авыр. Әгәр исбатламасаң, түләүләр азрак күләмдә бирелә», — диде Кабыш.
Ул әфган сугышчыларының консультация алу өчен Казанның Патрис Лумумба урамында урнашкан ветераннар җәмгыяте штабына мөрәҗәгать итәргә мөмкинлеген әйтте. Биредә аларга юридик һәм психологик мәсьәләләрдән башлап, төрле сорауларны чишәргә ярдәм күрсәтәчәкләр.