Баулы районында әбиләргә багышланган бәйрәм булды
(Казан, 5 март, «Татар-информ»). Баулы районының Яңа Чүте авылы «Ак калфак» оешмасы җитәкчесе Фәйрүзә ханым Әхәтова башлангычы белән мәктәптә «Күңел җылым сиңа, әбием!» дип исемләнгән бәйрәм чарасы узды.
Бәйрәмне оештыруда мәктәп, балалар бакчасы, мәдәният йорты хезмәткәрләре, укытучылар, укучылар, балалар бакчасы нәниләре — барысы да бик теләп, актив катнашты. Бу турыда Бөтендөнья татар конгрессының матбугат хезмәте хәбәр итә.
Бәйрәмгә авыл апалары, әбиләре чакырылдылар. Зур концерт оештырылды. Соңыннан чәй өстәле артында җылы аралашып, сөйләшеп утырдылар.
Чара буыннар чылбырын югалтмау, олыларны хөрмәтләү, әбиләребезне зурлау максатыннан оештырылды.