Әгерҗедә китапханәчеләр тәҗрибә уртаклашырга җыелды
Әгерҗе районына ут күршеләр – Кече Пурга һәм Пугачево бистәсеннән китапханәчеләр килде. Әлеге чара Әгерҗе һәм Кече Пурга районнары арасындагы хезмәттәшлек килешүе кысаларында узды. Ике район китапханәчеләренең бу – икенче очрашулары.
Узган елның декабрендә Әгерҗе районы китапханәчеләре Удмуртиядә яшәүче хезмәттәшләренең эш тәҗрибәсен өйрәнеп кайткан иде. Бу юлы алар ут күршеләребезне үзләренең эшчәнлекләре белән таныштырды.
Кунакларны районда яшәүче татар, рус, удмурт милләтләренең милли ризыклары белән каршы алдылар. Аларны мәдәният бүлеге җитәкчесе Язгөлем Гыймазетдинова һәм үзәкләштерелгән китапханәләр системасы директоры Эльмира Капилова сәламләде.
Очрашуда катнашучыларны үзәк һәм балалар китапханәләренең эшчәнлекләре белән таныштырдылар. Китапханәчеләр үзара фикер алышты, яңалыклар белән бүлеште. Наил Таҗиев, Язгөлем Гыймазетдинова, Чулпан Нурмөхәммәтова кунакларга үзләренең җырларын бүләк итте. Кунаклар балалар китапханәсендә яшь китап укучылар Дилия Закирова, Данил Закировның чыгышларын да сокланып тыңлады.
Бу көнне китапханәчеләр Иж-Бубыйда да булды. Алар өчен сәүдәгәр Мөхәммәтҗан Әхмәтҗановның торгызылган музей-йортына, авыл китапханәсенә экскурсия оештырылды.
Тулырак: http://agryz-rt.ru/news/yashaesh/keche-purga-kitapkhanchelre-gereg-trib-urtaklashyrga-kildelr