Екатеринбург митрополитына Ислам кабул итүнең юбилеена багышланган медаль тапшырдылар
Свердловск өлкәсе мөселманнары Диния нәзарәте (Үзәк мөфтият) рәисе Абдул Котдус Ашарин Екатеринбург һәм Верхотурье митрополиты Евгенийга «Идел буе Болгар дәүләтендә ислам дине кабул ителүнең 1100 еллыгы» юбилей медален тапшырды. Бу хакта Россия мөселманнары Дини җыены Үзәкләштерелгән дини оешмасы матбугат хезмәте хәбәр итә.
Медальне тапшыру тантанасын Бөек православие бәйрәме – Пасхага багышлап, Екатеринбургның «Храм на Крови» гыйбадәтханәсе янында уздырганнар, диелә хәбәрдә.
«Шуның белән мөселманнар владыканың төбәктәге диалогка керткән өлешен билгеләп үтте. Мөфти Ашарин үз чыгышында барлык христианнарны уразаның тәмамлануы һәм Пасха бәйрәме белән котлады. Шулай ук митрополитны ифтарда катнашу һәм мөселманнар алдында чыгыш ясау өчен мөфтият резиденциясенә чакырды», диелә Дини җыен хәбәрендә.