Галим Илдар Үтәмешев: «Татар галимнәре» китабы белән татар фәненең дәрәҗәсен күтәрдек
«Талантлы татар кешеләре фәндә алга таба да булачак. Без төрки дөньяда авторитетлы халык», - диде техник фәннәр докторы.
Техник фәннәр докторы, Россия табигый фәннәр академиясе академигы Илдар Үтәмешев фикеренчә, «Татар галимнәре» китабы - татар фәненең дәрәҗәсен күтәрә торган хезмәт.
«Без академик фәннең татар үзәген булдырдык, мин аның рәисе. Китапны чыгару теләге ике ел элек туды, татар фәненең дәрәҗәсен күтәрергә булдык. Фәннең милләте юк, әмма мактауга лаеклы вәкилләре бар, алар гасырлар дәвамында үсеш алган милләтнең потенциалын күрсәтә», - диде «Татар-информ»да матбугат очрашуында «Татар галимнәре» китабының җаваплы мөхәррире һәм төзүчесе.
Китапка ярымтатар яки керәшен татарлары милләтеннән булган кешеләр дә кертелгән. «Руслан Гринберг – Россия Фәннәр академиясенең Икътисад институты директоры. Ул әнисе ягыннан – татар, татар телен белә. Инженерлык гаскәрләре генерал-лейтенанты Дмитрий Карбышев бар. Ул - керәшен татары. Ничек без аларны төшереп калдырыйк, ди? Алар да безнең байлыгыбыз», - диде галим.
Китапка шулай ук ковидтан вакцина уйлап тапкан авторлар да кертелгән. «ЭпиВакКорона» вакцинасын «Вектор» Новосибирск үзәге генераль директоры, биология фәннәре докторы - Ринат Мәксутов, «КовиВак» вакцинасын Чумаков исемендәге үзәкне җитәкләгән медицина фәннәре докторы Айдар Ишмөхәммәтов эшләгән. Алар да бар», - диде ул.
«Фәнни дәрәҗәләре булмаган, әмма зур программалар: исәпләү техникасын үстерү белән җитәкчелек иткән кешеләр күп. Китапта алар урын алды. Һәр галим игътибарга лаек. Ул замандагы кешеләр күпкә акыллырак булган. Иң мөһиме - алар безгә бай мирас калдырган. Минемчә, талантлы татар кешеләре фәндә алга таба да булачак. Без төрки дөньяда авторитетлы халык», - ди Илдар Үтәмешев.
«Татар галимнәре» китабы 500 данә белән чыккан. «Галимнәребез күп, татар тарихы затлы, борынгы. Болгар заманыннан ук башланган. Һәр шәхес турында тулы мәгълүмат бирергә тырыштык. Араларында дин кешеләре дә бар. Чөнки алар татарның рухын күтәргән. Татарстан мөфтие Камил Сәмигуллин белән киңәшләшеп эшләдек. Китапта урын алган шәхесләр халыкка хезмәткә гомерләрен биргән. Кызганыч, кайбер галимнәр безнең арада юк», - диде ул.