Казанның «Болгар» мәчетен капиталь төзекләндерүгә 35 миллион сум акча тотылачак
Казанның «Болгар» мәчетен (Мусин урамы, 10) капиталь төзекләндерүгә 35,3 миллион сумнан артык акча тотылачак. Шул хактагы тендер дәүләт сатып алулары порталында урнаштырылган.
Тендер документларыннан күренгәнчә, башкаручы бинаның фасадын һәм цоколь биеклегендәге катын ремонтларга, ишек һәм тәрәзәләрен алыштырырга тиеш. Шулай ук түбәсен һәм су агып төшә торган системасын төзекләндерү бурычы тора. Моннан тыш, мәчетнең болдыры алыштырылачак һәм яңа лампочкалар куелачак.
Эшләр быелның 1 декабренә кадәр тәмамланырга тиеш. Заказчысы – ТР Баш инвестицион-төзелеш идарәсе, акча республика бюджетыннан бүленәчәк.
Конкурста катнашу өчен заявкалар 16 июньгә кадәр кабул ителә (заявка 1,7 миллион сумнан артык күләмдә тәэмин ителергә тиеш), ә подрядчыны 20 июньдә билгеләячәкләр.
- «Болгар» мәчете 1991-1993 елларда архитекторлар Виталий Логинов һәм Евгений Прокофьев проекты буенча төзелгән. Ул – Казанның Яңа Савин районында торгызылган беренче гыйбадәт йорты. Ак төстәге силикат кирпечтән гыйбарәт комплекс рационалистик архитектура стилистикасында эшләнгән.