Казан мэриясе метроның дүрт яңа станциясенең атамаларын билгеләде
Казан шәһәре Башкарма комитеты метрополитенның төзелеш эшләре алып барылучы икенче линиясе беренче участогындагы дүрт яңа станциянең атамаларын билгеләде. Шул хактагы документ бүген муниципаль хокукый актлар һәм документлар җыентыгында дөнья күргән.
Шәһәр Башкарма комитеты башлыгы имзалаган карарда түбәндәге атамаларны кушарга диелгән:
Юлиус Фучик урамында урнашкан станциягә - «100-летие ТАССР» — «ТАССРның 100 еллыгы»;
Юлиус Фучик урамындагы «10нчы микрорайон» шәһәр пассажир транспорты тукталышы янында урнашкан станциягә - «Академическая» — «Академия»;
Юлиус Фучик һәм Ломжа урамнары чатында урнашкан станциягә - «Зилант» — «Зилант»;
Альберт Камалиев проспектында урнашкан станциягә - «Тулпар» — «Тулпар»».
«Татар-информ» агентлыгы Бөтенроссия бәйгесе игълан ителүе, аның нәтиҗәләре буенча Казан метрополитенының икенче линиясендәге дүрт яңа станция интерьерларының иң яхшы концепциясе сайлап алыначагы хакында элегрәк хәбәр иткән иде. Конкурс турындагы нигезләмә интерьерлар концепциясенең станция атамалары белән бәйле булырга тиешлеген күздә тота.